Vətənə məhəbbət, milli birlik və dövlətə sədaqət hər bir xalqın mövcudluğunu və inkişafını müəyyən edən mühüm mənəvi dəyərlərdir. Azərbaycan xalqının müasir tarixində bu dəyərlərin gücü 2020-ci ildə baş vermiş Vətən müharibəsi zamanı xüsusilə aydın şəkildə nümayiş olundu. 44 gün davam edən müharibə yalnız hərbi əməliyyatlar dövrü deyil, eyni zamanda xalqın milli iradəsinin, həmrəyliyinin və vətənpərvərlik ruhunun sınağı idi.
Vətənpərvərlik insanın doğulduğu torpağa, onun tarixinə, mədəniyyətinə, dilinə və milli dəyərlərinə bağlılığı ilə ifadə olunur. Bu hiss yalnız müharibə zamanı deyil, gündəlik həyatda da özünü göstərməlidir. Öz peşəsini məsuliyyətlə yerinə yetirmək, cəmiyyətə fayda vermək, dövlətin inkişafına töhfə göstərmək və milli dəyərləri qorumaq vətənpərvərliyin mühüm təzahürləridir.
2020-ci il sentyabrın 27-də başlayan Vətən müharibəsi Azərbaycan cəmiyyətində güclü həmrəylik yaratdı. Cəbhədə döyüşən hərbçilərlə yanaşı, arxa cəbhədə fəaliyyət göstərən insanların da rolu böyük idi. Könüllülər, tibb işçiləri, müəllimlər, jurnalistlər, sosial sahədə çalışan mütəxəssislər və müxtəlif peşə sahibləri öz fəaliyyətləri ilə ümumi mübarizəyə dəstək verirdilər. Bu hadisələr göstərdi ki, milli birlik yalnız şüar deyil, konkret əməl və məsuliyyətlə təsdiqlənən ictimai dəyərdir.
Müharibə dövründə hərbi qulluqçuların göstərdiyi qəhrəmanlıq xüsusi qeyd olunmalıdır. Onların peşəkarlığı, dözümlülüyü və fədakarlığı xalqımızın yaddaşında əbədi yaşayacaqdır. Şəhidlərimizin xatirəsi, qazilərimizin həyat yolu və müharibə iştirakçılarının təcrübəsi gələcək nəsillər üçün mühüm tərbiyə mənbəyidir. Bu insanların qəhrəmanlığı gənclərə Vətən qarşısında məsuliyyətin nə demək olduğunu göstərir.
Vətənpərvərlik tərbiyəsində təhsil müəssisələrinin rolu xüsusilə əhəmiyyətlidir. Universitetlər yalnız peşəkar biliklərin verildiyi məkan deyil, həm də vətəndaş mövqeyinin, mənəvi keyfiyyətlərin və sosial məsuliyyətin formalaşdığı mühitdir. Müəllimlər tələbələrə ölkənin tarixini, milli-mənəvi dəyərlərini və müasir inkişaf istiqamətlərini elmi əsaslarla izah etməlidirlər. Tarixi hadisələrin düzgün öyrənilməsi gənclərin müstəqil düşünmə bacarığını və vətəndaşlıq məsuliyyətini gücləndirir.
Mülki müdafiə və ilkin tibbi yardım sahəsində tədris də vətənpərvərlik anlayışı ilə sıx bağlıdır. Fövqəladə hallar zamanı düzgün davranmaq, zərərçəkmişlərə ilkin yardım göstərmək, insanların təhlükəsizliyinin qorunmasına töhfə vermək hər bir vətəndaşın vacib bacarıqları sırasındadır. Bu biliklər insan həyatının qorunmasına, cəmiyyətin təhlükəsizliyinə və kollektiv məsuliyyətin inkişafına xidmət edir. Xüsusilə gənclərin mülki müdafiə hazırlığının artırılması müasir dövrdə mühüm əhəmiyyət kəsb edir.
Zəfər Günü milli birliyin qorunmasının və möhkəmləndirilməsinin vacibliyini bir daha xatırladır. Qələbənin mənəvi nəticələri gələcək nəsillərə ötürülməli, şəhidlərin xatirəsinə hörmət, qazilərə qayğı və dövlətçilik dəyərlərinə sədaqət cəmiyyətin gündəlik həyatında öz əksini tapmalıdır.
Müharibədən sonrakı dövrdə qarşıda duran əsas vəzifələrdən biri azad edilmiş ərazilərin bərpası və insanların doğma yurdlarına qayıdışının təmin edilməsidir. Bu prosesdə dövlət qurumları ilə yanaşı, bütün cəmiyyətin fəal iştirakı vacibdir. Quruculuq işlərinə, təhsilin və mədəniyyətin inkişafına, sosial rifahın yüksəldilməsinə yönələn fəaliyyət Zəfərdən sonra milli inkişafın əsas istiqamətlərindəndir.
Beləliklə, Vətən müharibəsi Azərbaycan xalqının milli birliyinin və vətənpərvərlik ruhunun gücünü nümayiş etdirdi. 8 Noyabr – Zəfər Günü bu dəyərlərin qorunması, gənc nəslə aşılanması və gələcək inkişaf naminə birgə fəaliyyət göstərilməsi üçün mühüm tarixi çağırışdır.
Gülara Sadıxova,
Bakı Slavyan Universitetinin baş müəllimi
