Yeni Azərbaycan Partiyası Hacıqabul rayon təşkilatının ərazi partiya təşkilatlarında Prezident İlham Əliyevin VIII Qurultayda müəyyən etdiyi inkişaf istiqamətlərinin və qarşıya qoyulan əsas hədəflərin müzakirəsi davam etdirilir. Bu görüşlərin əsas məqsədi qurultayda səsləndirilən çağırışların mahiyyətini partiya üzvlərinə çatdırmaq, təşkilati fəaliyyətin daha səmərəli qurulmasına nail olmaq və üzvlərin ictimai-siyasi proseslərdə iştirakını təşviq etməkdir.
26 oktyabr 2026-cı il tarixində Muğan qəsəbə və Qarasu kənd ərazi partiya təşkilatlarında keçirilən görüşlərdə YAP Hacıqabul rayon təşkilatının sədri İsmayıl İbrahimov və Hacıqabul rayon Ağsaqqallar Şurasının sədri Sahib Aslanov iştirak edərək çıxış ediblər. Tədbirdə Azərbaycanın sosial-iqtisadi inkişafı, dövlətin müəyyənləşdirdiyi strateji prioritetlər, beynəlxalq münasibətlər sistemində ölkəmizin mövqeyinin gücləndirilməsi və milli mənafelərin ardıcıl şəkildə müdafiə olunması istiqamətində həyata keçirilən siyasət diqqətə çatdırılıb.
YAP Hacıqabul rayon təşkilatının sədri İsmayıl İbrahimov vurğulayıb ki, VIII Qurultay Yeni Azərbaycan Partiyasının gələcək fəaliyyətinin istiqamətlərinin müəyyənləşdirilməsi və qarşıdakı dövr üçün mühüm vəzifələrin dəqiqləşdirilməsi baxımından əhəmiyyətli siyasi hadisədir. Prezident İlham Əliyevin müəyyən etdiyi hədəflərin reallaşdırılması ölkənin inkişaf tempinin qorunmasını, əldə edilmiş nailiyyətlərin möhkəmləndirilməsini və dövlətçilik prinsiplərinə sədaqətin davam etdirilməsini tələb edir. Bu prosesdə hər bir partiya üzvünün fəal mövqeyi, məsuliyyətli yanaşması və ümumi məqsədlər naminə səylərini birləşdirməsi xüsusi önəm daşıyır.
Görüşlərdə ərazi partiya təşkilatlarının yerli səviyyədə həyata keçirdiyi işlərin əhəmiyyəti də qeyd olunub. Bildirilib ki, əhali ilə müntəzəm təmasların qurulması, vətəndaşların müraciət və təşəbbüslərinə diqqətlə yanaşılması, eləcə də partiyanın fəaliyyət istiqamətləri barədə məlumatlandırma işinin genişləndirilməsi təşkilati fəaliyyətin əsas tərkib hissələrindəndir. Partiya üzvlərinin təşəbbüslərinin dəstəklənməsi və onların ictimai işlərə daha fəal cəlb olunması bu istiqamətdə qarşıya qoyulan məqsədlərə çatmağa imkan yaradır.
Müzakirələr zamanı cəmiyyətdə həmrəyliyin qorunması, gənc nəslin ictimai fəallığının artırılması, milli-mənəvi dəyərlərin təbliği və partiya üzvləri arasında qarşılıqlı əməkdaşlığın möhkəmləndirilməsi məsələlərinə toxunulub. İştirakçılar ölkənin tərəqqisinə xidmət edən təşəbbüslərin dəstəklənməsinin, dövlət maraqlarının daim üstün tutulmasının və ictimai məsuliyyətin artırılmasının vacibliyini ifadə ediblər.
