Məktəb yalnız biliklərin öyrədildiyi məkan deyil, həm də uşaqların sosial münasibətlər qurduğu və mənəvi dəyərləri mənimsədiyi bir mühitdir. Vahid məktəbli forması bu mühitin xarici görünüşünü müəyyənləşdirən elementlərdən biridir. Eyni geyim qaydalarının tətbiqi məktəbdə ümumi kimlik və kollektivə aidlik hissinin yaranmasına kömək edə bilər.
Şagirdlərin məktəb formasına riayət etməsi onların təhsil müəssisəsinin qaydalarına münasibətini də əks etdirir. Bu prosesdə uşaqlara geyim qaydalarının səbəbləri izah edilməli, onlarda kor-koranə tabeçilik deyil, qaydaları anlamaq və məsuliyyətli davranmaq bacarığı formalaşdırılmalıdır.
Məktəb mədəniyyətinin əsasını qarşılıqlı hörmət, dürüstlük, əməkdaşlıq və biliklərə maraq təşkil edir. Buna görə də vahid forma məktəbin bütün problemlərini həll edən vasitə kimi deyil, ümumi təhsil mədəniyyətini tamamlayan amil kimi qəbul edilməlidir.
Məktəb rəhbərliyinin, müəllimlərin və valideynlərin birgə fəaliyyəti bu sahədə mühüm əhəmiyyət daşıyır. Şagirdlərin fikirlərinə də diqqət yetirilməsi geyim qaydalarının daha düzgün mənimsənilməsinə və məktəbdə müsbət münasibətlərin möhkəmlənməsinə şərait yaradar.
Elşən İsmayılov,
YAP Nizami rayon təşkilatının fəalı
