Qardaş Türkiyədə səfərdə olan YAP nümayəndə heyəti konfransda iştirak edib
Qardaş Türkiyədə səfərdə olan Yeni Azərbaycan Partiyasının nümayəndə heyəti İstanbulda Türk Ağsaqqalları İctimai Birliyi və Türkiyədəki Azərbaycanlı İş Adamları Birliyinin birgə təşkilatçılığı ilə keçirilən ulu öndər Heydər Əliyevin 100 illik yubileyinə həsr olunmuş “Heydər Əliyev: Türk dünyası iqtisadiyyatı, siyasi inkişafı müddətində lider rolu” adlı konfransda iştirak edib.
Globalnews.az xəbər verir ki, tədbir iştirakçıları əvvəlcə Heydər Əliyev parkını ziyarət ediblər, Ümummilli Liderin parkdakı abidəsinin önünə tər çiçəklər düzülüb, xatirəsi ehtiramla anılıb.
Sonra konfrans üzvləri tərəfindən Ulu Öndər Heydər Əliyevin və Azərbaycanın ərazi bütövlüyü və müstəqilliyi uğrunda şəhid olan qəhrəmanlarımızın ruhu bir dəqiqəlik sükutla yad edilib. Azərbaycan və Türkiyənin dövlət himnləri səsləndirilib, Ümummilli Liderin həyat və fəaliyyətindən bəhs edən videoçarx nümayiş olunub. Azərbaycanın Türkiyədəki konsulu Nərminə Mustafayeva, Türk Ağsaqqalları İctimai Birliyinin rəhbəri Südeyif İmamverdiyev, Türkiyədəki Azərbaycanlı İş Adamları Birliyinin rəhbəri Elşən Quliyev, Milli Məclisinin deputatları Ramil Həsən, İmamverdi İsmayılov, Mahir Abbaszadə, Malik Həsənov, Sadiq Qurbanov, “SOCAR Türkiyə” şirkətinin baş direktoru Elçin İbadov çıxış ediblər.
Sonda Türk Ağsaqqalları İctimai Birliyi tərəfindən qonaqlara hədiyyələr təqdim olunub.
