Yol hər bir yaşayış məntəqəsinin inkişafında əsas amillərdən biridir. Yol varsa, şəhər və kəndlər bir-birinə bağlanır, insanlar rahat hərəkət edir, iqtisadi əlaqələr genişlənir. Qarabağda aparılan quruculuq işlərində yol və nəqliyyat infrastrukturuna xüsusi diqqət yetirilməsi də bu səbəbdən əhəmiyyətlidir. Yeni yollar yalnız nəqliyyat vasitələrinin hərəkəti üçün deyil, regionun gələcək iqtisadi və sosial həyatının formalaşması üçün əsas yaradır.
Xankəndidə dəmir yolu və avtovağzal kompleksinin yaradılması bu baxımdan diqqət çəkən layihələrdəndir. Ağdam–Xankəndi dəmir yolu xəttinin yaradılması və bu istiqamətdə yeni stansiyaların nəzərdə tutulması Qarabağın nəqliyyat əlaqələrinin inkişafına hesablanıb. Rəsmi məlumata görə, layihə çərçivəsində Əsgəran və Xocalı stansiyalarının da yaradılması planlaşdırılır. (president.az) Bu layihələrin həyata keçirilməsi şəhərlərin ölkənin digər bölgələri ilə əlaqələrinin genişləndirilməsinə xidmət edəcək.
Yol həm də Böyük Qayıdışın praktiki dayaqlarından biridir. İnsanların doğma yurdlarına qayıtması üçün təhlükəsiz və müasir nəqliyyat infrastrukturu vacibdir. Qayıdan ailələrin şəhərlərlə, rayon mərkəzləri ilə və ölkənin digər bölgələri ilə əlaqəsinin təmin olunması sosial həyatın davamlılığı baxımından əhəmiyyətlidir. Eyni zamanda yollar iqtisadi fəaliyyətin inkişafı üçün də yeni imkanlar yaradır.
Bu gün Qarabağda çəkilən yolları yalnız asfalt və betonla ölçmək olmaz. Hər yeni yol insanları, yaşayış məntəqələrini və iqtisadi imkanları birləşdirir. Qarabağda çəkilən yollar həm doğma torpağa qayıdışı asanlaşdırır, həm də həmin torpaqları Azərbaycanın gələcək inkişaf xəritəsinə daha möhkəm bağlayır.
Vüsal Musayev,
YAP Nizami rayon təşkilatının fəal üzvü
