Azərbaycanın xarici siyasəti beynəlxalq əməkdaşlığın genişləndirilməsi, dövlətlər arasında qarşılıqlı etimadın gücləndirilməsi və milli maraqların qorunması prinsiplərinə əsaslanır. Prezident İlham Əliyevin rəhbərliyi ilə ölkəmiz müxtəlif regionlarla əlaqələrini inkişaf etdirir, yeni tərəfdaşlıqların qurulmasına və mövcud münasibətlərin daha da möhkəmləndirilməsinə diqqət yetirir.
Oktyabrın 13-də Laos Prezidenti Thonqlun Sisulitin Azərbaycana rəsmi səfəri bu siyasətin mühüm nümunələrindən biri olub. Prezident İlham Əliyev ilə keçirilən görüşlərdə iki ölkə arasındakı münasibətlərin vəziyyəti və gələcək əməkdaşlığın perspektivləri müzakirə edilib. Dövlət başçıları əlaqələrin müxtəlif istiqamətlərdə inkişaf etdirilməsinin vacibliyini vurğulayıblar.
Azərbaycanla Laos arasında 30 ildən artıqdır davam edən diplomatik münasibətlər qarşılıqlı hörmət və siyasi dialoq üzərində qurulub. Beynəlxalq təşkilatlarda əməkdaşlıq, parlamentlərarası əlaqələr və siyasi partiyalar arasında təmaslar münasibətlərin davamlı inkişafına xidmət edir. Bu əlaqələr iqtisadi və humanitar sahələrdə yeni təşəbbüslər üçün də zəmin yaradır.
Görüş zamanı ticarət dövriyyəsinin artırılması, investisiya imkanlarının araşdırılması, təhsil sahəsində əlaqələrin genişləndirilməsi və nəqliyyat bağlantılarının inkişafı müzakirə olunub. Bakıda keçirilməsi nəzərdə tutulan Laos-Azərbaycan biznes-forumu iqtisadi əməkdaşlığın daha konkret istiqamətlər üzrə inkişafına kömək edə bilər.
Prezident İlham Əliyevin həyata keçirdiyi xarici siyasət Azərbaycanın beynəlxalq mövqeyinin möhkəmlənməsinə və dost ölkələrlə qarşılıqlı faydalı münasibətlərin inkişafına yönəlib. Laosla əlaqələrin genişləndirilməsi bu siyasətin tərkib hissəsidir. Qarşılıqlı iradə və konkret təşəbbüslər iki ölkə arasında uzunmüddətli əməkdaşlığın inkişafı üçün əlverişli imkanlar yaradır.
Firuzə Əmirova,
YAP Nizami rayon təşkilatının fəalı
