Azərbaycan həm diplomatik məkanda, həm də mənəvi müstəvidə sülhün və tərəqqinin qarantı kimi öz mövqeyini möhkəmləndirməkdədir. Sentyabrın 15-də Prezident İlham Əliyev Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısında və Yəhya Bakuvi Beynəlxalq Konfransında iştirak edən geniş tərkibli beynəlxalq nümayəndə heyətini qəbul edərək, birliyin vacibliyini ön plana çəkdi. Müxtəlif qardaş ölkələrin və Şimali Qafqaz respublikalarının dini rəhbərlərinin iştirakı ilə baş tutan bu görüşdə Prezident İlham Əliyev vurğuladı ki, böyük tarixi keçmişə söykənən bu birgə fəaliyyətlər dünyaya, xüsusilə də müsəlman cəmiyyətlərinə sülh, əməkdaşlıq və sarsılmaz həmrəylik mesajı verir.
Dövlət başçısı eyni vaxtda Bakıda keçirilən iki mühüm tədbirin tarixi əhəmiyyətini dəyərləndirərək Azərbaycanın mənəvi irsinin zənginliyinə toxundu. O bildirdi ki, Seyid Yəhya Bakuvi, Nizami Gəncəvi və Məhəmməd Füzuli kimi dahilərin irsi təkcə Azərbaycanın yox, bütün İslam dünyasının sərvətidir. TDT daxilində Azərbaycanın yeganə Qafqaz dövləti olduğunu xatırladan Prezident İlham Əliyev, Qafqaz və Türk aləminin tarixən vahid bir coğrafiya olaraq bir-birinə bağlı olduğunu bəyan edərək, Bakının bu iki mühüm geopolitik məkan arasında qızıl körpü rolunu oynadığını qeyd etdi.
Qlobal çağırışlar və İslam aləmindəki mövcud vəziyyətlə bağlı mühüm məqamlara toxunan Prezident İlham Əliyev, din xadimlərinin sülh yaradıcılığındakı rolunu xüsusi dəyərləndirdi. O bildirdi ki, İslam dininə kənardan zərbə vurmağa çalışan qüvvələrin qarşısını almaq üçün vahid bir ailə kimi birləşmək mütləqdir. 2017-ci ildə İslam Həmrəylik Oyunlarına ev sahibliyi edən Azərbaycanın 2025-ci ildə İslam Əməkdaşlıq Təşkilatının Zirvə Görüşünə ev sahibliyi edəcəyini qeyd edən dövlət başçısı, ölkəmizin siyasətinin heç vaxt təcrid olunmaya yox, yalnız sülhə, ixtilafların həllinə və qlobal tərəqqiyə yönəldiyini əminliklə bildirdi.
Görüşün ən təsirli məqamlarından biri Prezident İlham Əliyevin işğaldan azad edilmiş ərazilər, Ermənistanın terrorçu siması və Azərbaycanın Vətən müharibəsindəki Qələbəsi barədə söylədiyi faktlar oldu. Dini liderlərin Qarabağa gözlənilən səfərlərini dəyərləndirən dövlət başçısı, qonaqların həm 30 illik erməni vəhşiliyinin – məhv edilmiş 65 məscidin qalıqlarını görəcəklərini, həm də dirçələn, yenidən qurulan Şərqi Zəngəzurla tanış olacaqlarını bildirdi. Prezident İlham Əliyev bir daha bəyan etdi ki, güc amilinin həll etdiyi bugünkü dünyada Azərbaycan xalqı öz şəhidlərinin qanı bahasına milli ləyaqətini və ədaləti tam bərpa edərək qalib dövlət kimi qürurla yaşayır və inkişaf edir.
Sülhanə Nəsibova,
YAP Nizami rayon təşkilatının “Bəkir Çobanzadə küçəsi, 345” ərazi partiya təşkilatının sədr müavini
