Tarix sübut edir ki, güclü dövlətin ən möhkəm dayaqlarından biri güclü ordudur. Müstəqilliyini qorumaq, milli maraqlarını təmin etmək və xalqının təhlükəsizliyini qorumaq istəyən hər bir ölkə qüdrətli Silahlı Qüvvələrə malik olmalıdır. Azərbaycan da bu yolu seçmiş və məqsədyönlü ordu quruculuğu siyasəti nəticəsində regionun ən güclü ordularından birini formalaşdırmışdır.
Azərbaycan Ordusunun bugünkü gücü təsadüfən yaranmamışdır. Bunun təməlində Ümummilli Lider Heydər Əliyevin müəyyən etdiyi uzaqgörən strategiya dayanır. Ulu Öndər hakimiyyətə qayıtdıqdan sonra ölkədə sabitliyin təmin olunması ilə yanaşı, milli ordu quruculuğunu dövlət siyasətinin prioritet istiqamətlərindən birinə çevirdi. Məhz onun rəhbərliyi ilə vahid komandanlığa tabe olan nizami ordu yaradıldı, hərbi kadr hazırlığı gücləndirildi və Silahlı Qüvvələrin inkişafı üçün möhkəm təməl formalaşdırıldı.
Heydər Əliyev qeyd edirdi ki, xalqla ordunun birliyi dövlətin qüdrətini artıran ən mühüm amillərdən biridir. Bu gün Azərbaycan Ordusunun gücünün əsas mənbələrindən biri də məhz xalqın öz ordusuna olan inamı və sevgisidir. Azərbaycan əsgəri Vətəni yalnız bir borc kimi deyil, müqəddəs əmanət kimi qoruyur.
Prezident, Silahlı Qüvvələrin Ali Baş Komandanı İlham Əliyevin rəhbərliyi dövründə ordu quruculuğu siyasəti yeni mərhələyə qədəm qoydu. Silahlı Qüvvələrin maddi-texniki bazası gücləndirildi, hərbi büdcə dəfələrlə artırıldı, ən müasir silah və texnikalar alındı, beynəlxalq standartlara uyğun təlimlər keçirildi. Komando birliklərinin yaradılması, hərbi sənayenin inkişafı və peşəkar kadr potensialının genişləndirilməsi ordumuzun döyüş qabiliyyətini daha da yüksəltdi.
Aparılan uğurlu siyasətin ən parlaq nəticəsi isə 2020-ci ildə qazanılmış tarixi Zəfər oldu. Qəhrəman Azərbaycan Ordusu cəmi 44 gün ərzində işğal altında olan torpaqlarımızı azad etdi, ölkəmizin ərazi bütövlüyünü bərpa etdi və xalqımızın otuz illik həsrətinə son qoydu. Bu Zəfər göstərdi ki, illər ərzində həyata keçirilən ordu quruculuğu siyasəti düzgün və uzaqgörən siyasət olmuşdur.
Bu gün Azərbaycan Ordusu təkcə regionun deyil, dünyanın güclü orduları sırasında yer alır. Ordumuzun gücü yalnız müasir silahlarla ölçülmür. Onun əsas qüvvəsi vətən sevgisi ilə döyünən ürəklərdə, şəhidlərin müqəddəs xatirəsinə sədaqətdə, dövlətə və xalqa bağlılıqda ifadə olunur.
Müzəffər Ordumuzun qazandığı qələbələr Azərbaycan xalqının qürur mənbəyinə çevrilmişdir. Zəfər muzeyləri, memorial komplekslər və qəhrəmanlıq salnamələri gələcək nəsillərə bu şanlı tarixi yaşadır. Gənclərin hərbi təhsilə marağının artırılması, vətənpərvərlik ruhunda yetişdirilməsi isə ordumuzun gələcək uğurlarının təminatıdır.
Bu gün hər bir azərbaycanlı böyük qürur hissi ilə deyə bilər ki, müasir Azərbaycan Ordusu məqsədyönlü siyasətin, güclü liderliyin, xalq-ordu birliyinin və sonsuz vətən sevgisinin məntiqli nəticəsidir. Bu ordu Azərbaycanın müstəqilliyinin keşiyində dayanan sarsılmaz qaladır, dövlətimizin gücü, xalqımızın qüruru və parlaq gələcəyimizin təminatıdır.
Yaşasın qüdrətli Azərbaycan Ordusu! Yaşasın Müzəffər Azərbaycan xalqı!
Aysu Abbasova ,
Bakı Slavyan universiteti,Xarici dil Müəllimliyi fakültəsi
