Dünya siyasətində məsafələri coğrafiya müəyyənləşdirir, dövlətləri bir-birinə yaxınlaşdıran isə siyasi iradə, qarşılıqlı etimad və dostluqdur. Azərbaycanla Laos arasında münasibətlər də məhz bu dəyərlər üzərində inkişaf edir. Prezident İlham Əliyevin oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana səfəri zamanı mətbuata verdiyi bəyanat iki ölkə arasındakı siyasi münasibətlərin mahiyyətini açmaqla yanaşı, gələcək əməkdaşlığın perspektivlərini də diqqət mərkəzinə gətirdi.
Səfərin siyasi əhəmiyyətini müəyyənləşdirən əsas məqamlardan biri prezidentlərin görüşü çərçivəsində Birgə Bəyanatın imzalanması oldu. Prezident İlham Əliyevin vurğuladığı kimi, bu sənəd gələcək əməkdaşlığın əsas istiqamətlərini özündə ehtiva edir. Başqa sözlə, söhbət yalnız mövcud münasibətlərin təsdiqindən deyil, dostluğun yeni əməkdaşlıq imkanları ilə zənginləşdirilməsindən gedir. Çünki diplomatiyada əsl nəticə səsləndirilən fikirlərin konkret addımlara, siyasi razılaşmaların isə real tərəfdaşlığa çevrilməsi ilə əldə olunur.
Azərbaycanla Laos dünyanın fərqli coğrafiyalarında yerləşsələr də, aralarındakı siyasi dialoq göstərir ki, dostluğun sərhədlərini kilometrlərlə ölçmək mümkün deyil. Cənubi Qafqazdan Cənub-Şərqi Asiyaya uzanan bu münasibətlər müxtəlif regionları təmsil edən dövlətlərin qarşılıqlı hörmət və ortaq maraqlar əsasında yaxınlaşmasının nümunəsidir. Belə əlaqələr Azərbaycanın beynəlxalq tərəfdaşlıq şəbəkəsinin genişlənməsinə, Laosla siyasi təmasların möhkəmlənməsinə və gələcək əməkdaşlıq imkanlarının araşdırılmasına şərait yaradır.
Prezident İlham Əliyevin Laosun Azərbaycan üçün dost ölkə olduğunu vurğulaması isə münasibətlərin siyasi mahiyyətini ifadə edən mühüm mesajdır. Dostluq sadəcə diplomatik ifadə deyil; o, qarşılıqlı inamla möhkəmlənən, ardıcıl siyasi dialoqla qorunan və ortaq təşəbbüslərlə inkişaf edən dəyərdir. Azərbaycanın xarici siyasətində dövlətlərin suverenliyinə, milli maraqlarına və bərabərhüquqlu əməkdaşlığa hörmət prinsipləri mühüm yer tutur. Laosla münasibətlərə verilən önəm də bu siyasətin məntiqindən irəli gəlir.
Müasir beynəlxalq münasibətlər sistemində siyasi etimadın qorunması qədər onu konkret nəticələrlə möhkəmləndirmək də vacibdir. Bu baxımdan, Birgə Bəyanat gələcək əməkdaşlıq üçün siyasi istiqamət müəyyənləşdirən mühüm sənəd kimi dəyərləndirilə bilər. Qarşılıqlı maraq doğuran sahələrdə yeni təşəbbüslərin irəli sürülməsi, təmasların genişləndirilməsi və əldə olunan razılaşmaların ardıcıl həyata keçirilməsi Azərbaycan-Laos əlaqələrinə yeni məzmun və dinamizm qazandıra bilər. Məhz bu mərhələdə siyasi yaxınlığın əməli əməkdaşlığa çevrilməsi münasibətlərin gələcək inkişafını müəyyən edən əsas amillərdən birinə çevrilir.
Laos Prezidentinin Azərbaycana səfəri bir daha nümayiş etdirdi ki, Bakı müxtəlif regionlarla əlaqələrin inkişafına, dost ölkələrlə dialoqun genişləndirilməsinə və qarşılıqlı faydalı tərəfdaşlığın möhkəmləndirilməsinə ardıcıl yanaşır. Azərbaycanın xarici siyasətinin gücü də məhz müxtəlif coğrafiyalarda etibarlı münasibətlər qurmaq, milli maraqları qorumaq və əməkdaşlıq üçün yeni imkanlar yaratmaq bacarığında özünü göstərir.
Beləliklə, Azərbaycan-Laos münasibətləri qarşılıqlı hörmət və siyasi etimadın dövlətlərarası əlaqələrin inkişafında oynadığı mühüm rolu bir daha təsdiqləyir. Prezident İlham Əliyevin bəyanatı və imzalanan Birgə Bəyanat iki ölkə arasında dostluğun gələcək əməkdaşlıqla möhkəmləndirilməsi üçün mühüm siyasi zəmin yaradır. Qarşıda duran əsas vəzifə bu zəmini konkret təşəbbüslərlə möhkəmləndirmək, mövcud siyasi dialoqu yeni əməkdaşlıq imkanları ilə zənginləşdirməkdir.
Çünki dövlətlər arasında dostluğun həqiqi gücü məsafələrin yaxınlığında deyil, qarşılıqlı etimadın möhkəmliyində, siyasi iradənin ardıcıllığında və gələcəyə birlikdə açılan əməkdaşlıq yollarında ölçülür.
Aynur Şərif,
Yeni Azərbaycan Partiyası Nəsimi rayon təşkilatının əməkdaşı
