Hər bir ölkənin müstəqilliyi, ərazi bütövlüyü və təhlükəsizliyi onun silahlı qüvvələri tərəfindən qorunur. Ordusu güclü olan bir dövlət, istər daxildə, istərsə də beynəlxalq səviyyədə öz sözünü deyə bilir. Azərbaycanda da bu anlayışın tarixi və mənəvi dəyəri böyükdür. 26 İyun – Silahlı Qüvvələr Günü bu gücün, bu iradənin və bu qürurun rəmzidir.
Bu günün tarixi 1918-ci ilə, Azərbaycan Xalq Cümhuriyyəti dövrünə gedib çıxır. Həmin vaxt müstəqil Azərbaycanın ilk Milli Ordusu yaradıldı. Gənc, təzə qurulmuş bir dövlət üçün bu addım son dərəcə önəmli idi. Düzdür, sonradan Cümhuriyyət süqut etdi və ordu da fəaliyyətini dayandırdı. Amma bu tarixi addım unudulmadı. Nəhayət, 1998-ci ildə ümummilli lider Heydər Əliyevin təşəbbüsü ilə 26 iyun rəsmi olaraq Silahlı Qüvvələr Günü kimi qeyd olunmağa başladı.
Bu gün Azərbaycan Ordusu regionda ən güclü ordulardan biri kimi tanınır. Ordumuz həm texniki baxımdan müasirləşdirilib, həm də şəxsi heyət baxımından peşəkardır. Ordumuzda xidmət edən zabitlər və əsgərlər yüksək döyüş hazırlığına malikdir. Bu gün bu güc sadəcə silah-sursatla yox, həm də ruh yüksəkliyi, vətən sevgisi və xalqla birlik sayəsində yaranıb.
Bunun ən aydın sübutu 2020-ci ildə baş vermiş 44 günlük Vətən müharibəsidir. Həmin dövrdə Azərbaycan Ordusu xalqla çiyin-çiyinə döyüşərək torpaqlarımızı işğaldan azad etdi. Bu, təkcə hərbi zəfər deyildi – bu, həm də ruhun, milli birliyin və güclü dövlətin qələbəsi idi. Ordumuz təkcə hərbi bir qurum deyil. O, həm də vətənpərvərliyin, sədaqətin və mənəvi gücün təmsilçisidir. Bu gün gənclər hərbi xidmətə daha ciddi yanaşır, orduya getməyi borc və şərəf sayır. Bu isə gələcəyin daha da güclü və inamlı bir şəkildə qurulacağına əminlik yaradır.
26 İyun təkcə keçmişə baxış deyil, həm də gələcəyə mesajdır. Bu gün biz nəinki əvvəlki nəsillərin gördüyü işlərlə qürur duyuruq, həm də özümüzün də bu yolda məsuliyyət daşıdığımızı dərk edirik. Güclü dövlət olmaq üçün güclü orduya, güclü ordu üçün isə birlikdə addımlayan xalqa ehtiyac var.
Sonda demək olar ki, 26 İyun – güclü ordunun, güclü dövlətin simvoludur. Bu tarix bizim tariximiz, bizim qürurumuz və gələcək nəsillərə örnək olacaq bir gündür. Ordumuz var, demək ki, Vətənimiz güvəndədir.
Çinarə Musayeva,
Yeni Azərbaycan Partiyası Nizami rayon təşkilatının fəalı
