Prezident İlham Əliyevin təsis etdiyi şəhər günləri işğaldan azad edilmiş ərazilərin əhəmiyyətini ön plana çıxarır. 26 avqust – Laçın günü, xalqımızın mübarizə ruhu və dövlətimizin hərbi-siyasi uğurlarının ifadəsi kimi qeyd olunur.
Laçın rayonu strateji baxımdan kritik ərazi olub, uzun illər Qarabağı Ermənistanla birləşdirən əsas nəqliyyat qovşağı rolunu oynayıb. 1992-ci ildən işğal altında qalması regionun təhlükəsizlik və nəqliyyat sistemini ciddi şəkildə sarsıtmışdır.
44 günlük Vətən müharibəsi nəticəsində Laçın 1 dekabr 2020-ci ildə döyüşsüz olaraq Azərbaycana qaytarıldı. Bu, xalqın sarsılmaz iradəsi və dövlətin siyasi qətiyyətinin bariz göstəricisi kimi tarixdə qaldı. 2022-ci il avqustun 26-da isə Laçın şəhəri, Zabux və Sus kəndləri tam nəzarətə alındı, 2023-cü ilin aprelində isə sərhəd-keçid məntəqəsi istifadəyə verildi. Bu tədbirlər Azərbaycanın suverenliyini və beynəlxalq hüquqa uyğun idarəetməni möhkəmləndirdi.
Laçın dağlıq relyefi və yüksəklikləri ilə hərbi-strateji üstünlük yaradır. Azad olunması bölgədə təhlükəsizlik sistemini gücləndirərək separatçı qüvvələrin hərbi imkanlarını əhəmiyyətli dərəcədə zəiflətdi.
Bölgədə infrastrukturun bərpası – yollar, elektrik və su xətləri, şəhər və kəndlərin yenidən qurulması – iqtisadi və sosial həyatın dirçəlməsini təmin edir. Laçın Beynəlxalq Hava Limanı isə regionu dünya ilə birləşdirərək turizm və ticarət imkanlarını artırır.
Keçmiş məcburi köçkünlərin qayıdışı milli kimliyin bərpasına, tarixi yaddaşın qorunmasına və sosial rifahın yüksəlməsinə xidmət edir. Laçın artıq yalnız qələbənin deyil, həm də davamlı inkişafın simvoludur.
Mehriban Nadirova,
Yeni Azərbaycan Partiyasının fəalı
