Hər il oktyabrın 20-də qeyd olunan Zəngilan Şəhəri Günü Azərbaycan xalqı üçün xüsusi məna daşıyır. Bu tarix xalqımızın torpaqlarına bağlılığını, azadlıq istəyini və çətinliklər qarşısında sınmayan iradəsini təcəssüm etdirir. Zəngilanın azad edilməsi bütün ölkədə böyük sevinc və qürur hissi yaratmışdır.
Prezident İlham Əliyevin 2023-cü il iyulun 31-də imzaladığı sərəncamla oktyabrın 20-si Zəngilan Şəhəri Günü kimi müəyyən edilmişdir. Bu qərar şəhərin azad olunmasının tarixi əhəmiyyətini dövlət səviyyəsində bir daha təsdiqləyir. Əlamətdar gün həm şəhidlərin xatirəsinə ehtiramın, həm də qələbənin dəyərinin ifadəsidir.
Zəngilanın azadlığı Müzəffər Ali Baş Komandan Prezident İlham Əliyevin rəhbərliyi ilə Azərbaycan Ordusunun göstərdiyi qəhrəmanlığın nəticəsidir. Vətən müharibəsi dövründə hərbçilərimizin peşəkarlığı, cəsarəti və vətənpərvərliyi xalqımızın yaddaşında silinməz iz buraxdı. Qazanılan qələbə milli həmrəyliyin gücünü də nümayiş etdirdi.
Bu gün Zəngilan Şəhəri Günü yalnız keçmişdə əldə edilmiş uğurun xatırlanması ilə məhdudlaşmır. Şəhərdə və rayonun kəndlərində aparılan quruculuq işləri bu tarixin yeni məzmununu formalaşdırır. Müasir yaşayış sahələrinin yaradılması, yolların çəkilməsi və ictimai xidmətlərin qurulması insanların doğma torpaqlara qayıdışını asanlaşdırır.
Zəngilan Şəhəri Günü hər bir azərbaycanlıya dövlət müstəqilliyinin və milli birliyin dəyərini xatırladır. Prezident İlham Əliyevin rəhbərliyi ilə azad edilmiş ərazilərdə həyata keçirilən bərpa tədbirləri qələbənin davamlı nəticələrini möhkəmləndirir. Bu bayram Zəngilanın keçmişinə ehtiram, bu gününə qürur və gələcəyinə inam deməkdir.
Aytən İsmayılova,
YAP Nizami rayon təşkilatının fəalı
