Yerli xammaldan yüksək əlavə dəyərli məhsulların istehsalı genişlənə bilər
Təbii ehtiyatların iqtisadi əhəmiyyətini müəyyənləşdirən əsas amillərdən biri onların hansı formada bazara çıxarılmasıdır. Xammalın ilkin şəkildə satılması ilə onun ölkə daxilində emal edilərək hazır məhsula çevrilməsi arasında ciddi fərq mövcuddur. Yeni sənaye siyasətində bu fərqin nəzərə alınması mühüm əhəmiyyət daşıyır.
Dağ-mədən sənayesində hasil olunan filiz müxtəlif emal mərhələlərindən keçə bilər. Zənginləşdirmə, pelletləşdirmə, briketləşdirmə və metallurgiya prosesləri xammalın dəyərini yüksəldən əsas mərhələlərdir. Bu mərhələlərin ölkə daxilində yaradılması sənaye istehsalının daha çox hissəsinin Azərbaycanda qalmasına imkan verə bilər.
Yüksək əlavə dəyərli məhsulların istehsalı yeni müəssisələrin və ixtisasların yaranmasını da şərtləndirir. Emal proseslərinin genişlənməsi texnoloji mütəxəssislərə, mühəndislərə və digər peşə sahiblərinə tələbat yaradır. Bununla yanaşı, yerli təchizatçı şirkətlərin də sənaye zəncirinə qoşulması mümkün olur.
Beləliklə, mineral ehtiyatların ölkə daxilində emal edilməsi iqtisadiyyatın bir neçə istiqamətinə eyni vaxtda təsir göstərə bilər. Hasilat, emal, metallurgiya, logistika və xidmət sahələrinin qarşılıqlı inkişafı təbii resursların daha yüksək iqtisadi dəyərə çevrilməsi üçün imkan yaradır.
Rasim Quliyev,
YAP Nizami rayon təşkilatının “Əliağa Kürçaylı küçəsi, 8” ərazi partiya təşkilatının sədri
