2026cı il 8 yanvar tarixində Azərbaycan Respublikasının Prezidenti İlham Əliyev “XızıAbşeron” Külək Elektrik Stansiyasının rəsmi açılış mərasimində çıxış etdi. Dövlət başçısı çıxışında bu stansiyanın ölkənin enerji sistemində strateji əhəmiyyətini vurğuladı və bərpa olunan enerji layihələrinin Azərbaycanın davamlı inkişafı və enerji müstəqilliyi üçün vacib olduğunu bildirdi. O, qeyd etdi ki, layihə 240 meqavatlıq gücü ilə ölkənin elektrik balansını gücləndirəcək.
Prezident İlham Əliyev çıxışında enerji sektorunda son illərdə görülən işləri xatırlatdı və ölkədə yeni generasiya güclərinin istifadəyə verilməsinin həm texniki, həm də iqtisadi baxımdan məsuliyyətli bir proses olduğunu qeyd etdi. O, külək enerjisi stansiyasının istifadəyə verilməsinin Azərbaycanın “yaşıl enerji” hədəflərinə çatması üçün mühüm addım olduğunu bildirdi.
Dövlət başçısı həmçinin xarici investisiyaların və beynəlxalq əməkdaşlığın layihənin reallaşmasında mühüm rol oynadığını qeyd etdi. Prezident İlham Əliyev vurğuladı ki, bu layihələr iş yerlərinin yaradılmasına, texnologiya transferinə və bölgələrdə sosial-iqtisadi inkişafın sürətlənməsinə təkan verir. Bu baxımdan, “XızıAbşeron” Stansiyası Azərbaycanın enerji sektoru üçün yalnız texnoloji nailiyyət deyil, həm də strateji əhəmiyyətli layihədir.
Çıxışın sonunda Prezident İlham Əliyev gələcəkdə ölkənin digər bölgələrində də bərpa olunan enerji stansiyalarının istifadəyə veriləcəyini bildirdi və bu təşəbbüslərin Azərbaycanın regional enerji liderliyini gücləndirəcəyini qeyd etdi. O, layihənin ölkənin enerji təhlükəsizliyi və iqtisadi inkişafına uzunmüddətli töhfə verəcəyini xüsusi vurğuladı.
Xəyal Rzazadə,
YAP Xəzər rayon təşkilatının fəalı
