Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısı təhlükəsizlik məsələlərinə preventiv yanaşmanın əhəmiyyətini gündəmə gətirən mühüm platformalardan biri olub. Prezident İlham Əliyev toplantının iştirakçılarına müraciətində qlobal və regional təhdid və risklərin müəyyənləşdirilməsi, eləcə də onların neytrallaşdırılması yollarının araşdırılmasının vacibliyini vurğulayıb. Bu yanaşma təhlükəsizlik siyasətində yalnız baş vermiş hadisələrə reaksiya göstərməklə kifayətlənməməyin əhəmiyyətini ortaya qoyur.
Preventiv təhlükəsizlik yanaşması mümkün risklərin əvvəlcədən müəyyən edilməsini və onların inkişaf dinamikasının izlənilməsini nəzərdə tutur. Terrorizm, transmilli cinayətkarlıq, narkotik vasitələrin qanunsuz dövriyyəsi və hibrid təhdidlər kimi risklər müxtəlif mərhələlərdən keçərək daha mürəkkəb təhlükələrə çevrilə bilər. Buna görə təhlükəsizlik qurumlarının analitik imkanlarının inkişaf etdirilməsi, məlumatların vaxtında paylaşılması və risklərin birgə qiymətləndirilməsi xüsusi əhəmiyyət daşıyır.
Prezident İlham Əliyevin təhlükəsizlik şuraları katiblərinin müntəzəm görüşlərinə verdiyi əhəmiyyət də bu kontekstdə nəzərdən keçirilə bilər. Belə görüşlər müxtəlif ölkələrin təhlükəsizlik strukturlarının mövcud risklər barədə məlumat mübadiləsi aparmasına şərait yaradır. Eyni zamanda ayrı-ayrı dövlətlərin qarşılaşdığı problemlər üzrə əldə edilmiş təcrübənin digər tərəflərlə paylaşılması preventiv tədbirlərin hazırlanmasına əlavə imkan verə bilər.
Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısı preventiv təhlükəsizlik anlayışının regional əməkdaşlıq müstəvisində müzakirəsinə imkan yaradıb. Görüşdə səsləndirilən fikirlər risklərin əvvəlcədən müəyyənləşdirilməsi, məlumat mübadiləsi və koordinasiyanın təhlükəsizlik siyasətində mühüm yer tutduğunu göstərir. Bu istiqamət TDT daxilində gələcək əməkdaşlığın praktiki sahələrindən biri kimi nəzərdən keçirilə bilər.
Gülsüm Hacıyeva,
YAP Nizami rayon təşkilatının “Məmmədəli Şərifli küçəsi, 159” ərazi partiya təşkilatının sədri
