“Azərbaycan Respublikası ilə Slovakiya Respublikası arasında münasibətlər son illərdə ardıcıl və dinamik inkişaf mərhələsinə qədəm qoyub. İkitərəfli əlaqələrin siyasi, iqtisadi və humanitar istiqamətlər üzrə genişlənməsi, qarşılıqlı səfərlərin intensiv xarakter alması və yeni əməkdaşlıq sahələrinin müəyyənləşdirilməsi Azərbaycan-Slovakiya tərəfdaşlığının məzmun baxımından keyfiyyətcə yeni mərhələyə keçdiyini göstərir. Prezident İlham Əliyevin Slovakiya Respublikasının Prezidenti Peter Pelleqrininin Azərbaycana səfəri çərçivəsində Şuşada verdiyi bəyanat bu münasibətlərin inkişaf dinamikasını və əsas prioritetlərini aydın şəkildə ortaya qoyur. Dövlət başçısının vurğuladığı kimi, Azərbaycan–Slovakiya əlaqələri yüksək səviyyədədir və 2024-cü ildə imzalanmış Strateji Tərəfdaşlığa dair Birgə Bəyannamənin icrası istiqamətində mühüm işlər görülür. Prezident İlham Əliyevin qeyd etdiyi kimi, qarşılıqlı səfərlər və yüksək səviyyəli təmaslar iki ölkənin münasibətlərə verdiyi siyasi əhəmiyyətin göstəricisidir”.
Bunu açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, Strateji tərəfdaşlıq haqqında Birgə Bəyannamənin imzalanması Azərbaycan–Slovakiya münasibətlərinin inkişafında mühüm siyasi mərhələ təşkil edir. Bu sənəd iki ölkə arasında mövcud əməkdaşlığın daha geniş və sistemli çərçivədə inkişaf etdirilməsi üçün mühüm siyasi baza formalaşdırıb. Lakin burada əsas diqqət çəkən məqam ondan ibarətdir ki, Azərbaycan strateji tərəfdaşlıq anlayışına yalnız siyasi sənədlər müstəvisində yanaşmır. Prezident İlham Əliyevin bəyanatında xüsusi vurğulandığı kimi, belə münasibətlərin inkişafı güclü siyasi iradə və konkret fəaliyyət tələb edir. Bu yanaşma Azərbaycan xarici siyasətinin mühüm xüsusiyyətlərindən birini ifadə edir. Bakı üçün siyasi dialoq real əməkdaşlıq və praktiki nəticələrlə tamamlanmalıdır. Məhz bu baxımdan Azərbaycan–Slovakiya münasibətlərinin inkişafı yalnız siyasi təmasların artması ilə deyil, konkret layihələrin həyata keçirilməsi ilə müşayiət olunur.
“Azərbaycan–Slovakiya əməkdaşlığının mühüm istiqamətlərindən biri Slovakiyanın Qarabağın bərpası prosesində iştirakıdır. Prezident İlham Əliyevin bəyanatında Slovakiyanın Qarabağın bərpasına verdiyi töhfə xüsusi qeyd olunur. Slovakiya şirkətinin Ağdam rayonunun Baş Qərvənd kəndində “Ağıllı kənd” layihəsini həyata keçirməsi bu əməkdaşlığın praktik xarakterini nümayiş etdirir. Qarabağ və Şərqi Zəngəzur iqtisadi rayonlarında həyata keçirilən genişmiqyaslı bərpa və quruculuq işləri Azərbaycan dövlətinin qarşısında duran əsas prioritetlərdəndir. Bu prosesdə müxtəlif ölkələrin və xarici şirkətlərin iştirakı Azərbaycanın beynəlxalq tərəfdaşlarla əməkdaşlığının yeni istiqamətlərini formalaşdırır. Slovakiyanın bu prosesə qoşulması xüsusi əhəmiyyət daşıyır. Çünki bu, Avropa ölkəsinin Azərbaycanın işğaldan azad edilmiş ərazilərində həyata keçirilən quruculuq prosesində praktiki iştirakını göstərir. “Ağıllı kənd” layihəsi isə müasir texnologiyaların tətbiqi və dayanıqlı yaşayış məntəqələrinin yaradılması baxımından yeni əməkdaşlıq imkanlarını nümayiş etdirir. Prezident İlham Əliyevin Slovakiya Prezidentinə bu dəstəyə görə təşəkkür etməsi də iki ölkə arasında münasibətlərin konkret layihələr və qarşılıqlı faydalı əməkdaşlıq əsasında inkişaf etdiyini göstərir”.
Rəşadət Xalıqov əlavə edib ki, Azərbaycan–Slovakiya münasibətlərinin inkişafında digər mühüm məqam əməkdaşlıq gündəliyinin genişliyidir. Prezident İlham Əliyevin bəyanatından da göründüyü kimi, iqtisadi-ticari əlaqələr, energetika, hərbi-texniki əməkdaşlıq və digər istiqamətlər ikitərəfli müzakirələrdə prioritet təşkil edir. Bu fakt iki ölkə arasında münasibətlərin yalnız bir sahə ilə məhdudlaşmadığını göstərir. Əksinə, siyasi əlaqələrin yüksək səviyyəsi iqtisadi və digər sahələrdə əməkdaşlığın genişləndirilməsi üçün əlverişli şərait yaradır. Azərbaycanın enerji siyasəti və Avropanın enerji təhlükəsizliyinin təmin olunmasındakı rolu son illərdə ölkəmizin beynəlxalq tərəfdaşları ilə münasibətlərində mühüm yer tutur. Bu baxımdan Slovakiya ilə energetika sahəsində əməkdaşlığın inkişaf etdirilməsi də qarşılıqlı maraqlara əsaslanan istiqamətlərdən biri kimi qiymətləndirilə bilər. Eyni zamanda, hərbi-texniki əməkdaşlığın gündəlikdə yer alması iki ölkənin qarşılıqlı əlaqələrinin təhlükəsizlik aspektlərini də əhatə etdiyini göstərir. Müasir beynəlxalq münasibətlər sistemində siyasi və iqtisadi əməkdaşlığın təhlükəsizlik məsələləri ilə qarşılıqlı əlaqədə inkişaf etdiyi nəzərə alınarsa, bu istiqamətin əhəmiyyəti daha aydın görünür.
Onun sözlərinə görə, Prezident İlham Əliyevin Şuşada verdiyi bəyanat Azərbaycan–Slovakiya münasibətlərinin mövcud vəziyyətini və gələcək inkişaf istiqamətlərini aydın şəkildə ifadə edir. İki ölkə arasında siyasi əlaqələr yüksək səviyyədədir, strateji tərəfdaşlıq haqqında Birgə Bəyannamənin icrası istiqamətində konkret addımlar atılır və əməkdaşlıq gündəliyi genişlənir. Azərbaycanın xarici siyasətində əsas prinsiplərdən biri olan konkret nəticələrə əsaslanan əməkdaşlıq bu münasibətlərdə də özünü aydın şəkildə göstərir. Məhz buna görə Azərbaycan–Slovakiya əlaqələrinin gələcəkdə də qarşılıqlı maraqlar, siyasi iradə və praktiki əməkdaşlıq əsasında inkişaf edəcəyi qənaətinə gəlmək mümkündür.
