Müzəffər Ali Baş Komandan İlham Əliyevin azad olunmuş Ağdama hər səfəri şəhərin taleyində yeni bir dönüş nöqtəsi kimi yadda qalır. Bu səfərlər yalnız baxış və qiymətləndirmə məqsədi daşımır, həm də bölgənin gələcək inkişaf xəritəsinin müəyyənləşməsinə xidmət edir. Prezidentin Ağdama gəlişi, dağıdılmış şəhərin yenidən qurulması iradəsinin yüksək səviyyədə təsdiqi olmaqla yanaşı, bütün xalq üçün böyük motivasiya mənbəyinə çevrilir.
Ağdamın bərpası istiqamətində həyata keçirilən infrastruktur layihələri şəhərin gələcək simasını formalaşdıran mühüm elementlərdir. Elektrik təchizatı xətlərindən su sistemlərinə, nəqliyyat yollarından yaşayış məhəllələrinə qədər hər bir layihə müasir planlaşdırma prinsiplərinə əsaslanır. Bu proses yalnız fiziki quruculuğu deyil, bölgənin sosial-iqtisadi dirçəlişini də təmin edən genişmiqyaslı yenidənqurma modelini əhatə edir.
Prezident İlham Əliyevin səfərləri zamanı açılışı edilən və təməli qoyulan müəssisələr, sənaye parkları və xidmət sahələri Ağdamın iqtisadi dinamizminə yeni nəfəs verir. Yenilənən yollar və tikilən yeni magistrallar bölgənin digər rayonlarla əlaqəsini möhkəmləndirir, logistika və ticarət imkanlarını genişləndirir. Reallaşdırılan layihələrin hər biri Qarabağın uzunmüddətli inkişaf strategiyasının həlqəsidir.
Bu səfərlər həm də siyasi iradə və qətiyyətin real təzahürüdür. Ağdamın yenidən qurulması Azərbaycan dövlətinin gücünü, xalqın birliyini və tarixi ədalətin bərpasını əks etdirir. Prezidentin hər səfəri ilə şəhərin çiçəklənməsinə doğru atılan addımlar sürətlənir və Ağdam günbəgün yeni həyatına qovuşur.
Ləman Məmmədova
YAP Xəzər rayon təşkilatının fəalı
