“Azərbaycan Respublikasının Konstitusiyası Günü” xalqımızın hüquqi düşüncəsinin, milli iradəsinin və dövlət müstəqilliyinə sədaqətinin parlaq təzahürüdür. 12 Noyabr 1995-ci ildə ümumxalq səsverməsi ilə qəbul edilən Konstitusiya, dövlətçiliyimizin hüquqi və ideoloji təməlini yaratdı. Bu tarix yalnız bir sənədin deyil, azad və demokratik cəmiyyətin əsaslarının möhkəmləndirildiyi gün kimi yaddaşlara həkk olundu.
Konstitusiya Günü həm də hüququn aliliyinə, vətəndaş bərabərliyinə və insan azadlıqlarına hörmətin simvoludur. Bu bayram bizə göstərir ki, müasir Azərbaycan dövlətinin inkişafı məhz ədalətli və möhkəm hüquqi bünövrə üzərində qurulub. Hər bir vətəndaş bu günü dövlətinə, qanununa və milli kimliyinə hörmətlə qeyd edir.
Bu əlamətdar günün yaranmasında Ulu Öndər Heydər Əliyevin tarixi rolu xüsusi qeyd olunmalıdır. Onun rəhbərliyi ilə hazırlanan Konstitusiya həm milli ənənələrə, həm də beynəlxalq hüququn mütərəqqi prinsiplərinə əsaslanaraq, Azərbaycanın gələcəyinə açıq yol göstərdi. Hər maddəsində xalqın iradəsi, dövlətin məqsədi və insan ləyaqətinə ehtiram ifadə olunub.
Bu gün 12 Noyabr – “Azərbaycan Respublikasının Konstitusiyası Günü” – yalnız bir tarix deyil, həm də hər bir vətəndaş üçün vətəndaşlıq məsuliyyətini, dövlətə sədaqəti və hüquqa inamı xatırladan bir bayramdır. Bu gün azadlığın, ədalətin və milli birliyin hüquqi zirvəsini təcəssüm etdirir.
YAP Xəzər rayon təşkilatının fəalı
Ağadadaş Həsənalıyev
