Hər ilin 8 mart tarixi dünyada Beynəlxalq Qadınlar Günü kimi qeyd olunur. Bu gün sadəcə bir təqvim bayramı deyil, qadının cəmiyyətə bəxş etdiyi nurun, sevginin, fədakarlığın və gücün təntənəsidir. Qadın – həyatın özü, varlığın mayası, dünyanın ən zərif, eyni zamanda ən qüdrətli varlığıdır. Qadın ana deməkdir. Ana isə mərhəmətin, səbrin və sonsuz sevginin təcəssümüdür. Bir ananın baxışında kainat qədər dərinlik, ürəyində okean qədər mərhəmət var. O, körpəsinin ilk müəllimi, ilk dostu, ilk qəhrəmanıdır. Hər bir uğurlu insanın arxasında görünməyən bir qəhrəman – qadın dayanır. Qadın həm də incəlikdir. Onun varlığında yaz səhərinin təravəti, payız axşamının sakitliyi var. Zərifliyi zəiflik deyil – əksinə, qadının ən böyük gücüdür. O, həyatın sərt küləklərinə baxmayaraq, qəlbindəki ümid çırağını söndürmür.
Çünki qadın sevgisi ilə qurur, səbri ilə qoruyur, inamı ilə ucaldır. Tarix boyu qadınlar cəmiyyətin inkişafında mühüm rol oynamışlar. Elm sahəsində, siyasətdə, ədəbiyyatda, incəsənətdə adlarını qızıl hərflərlə yazdıran neçə-neçə qadınlarımız var. Onlar sübut ediblər ki, qadın zəkası və iradəsi sərhəd tanımır. Lakin qadının ən böyük uğuru vəzifələrdə deyil, toxunduğu ürəklərdə, dəyişdirdiyi talelərdə gizlidir. Bu gün artıq təkcə qadınların hüquqları uğrunda mübarizənin simvolu deyil, həm də onların cəmiyyətin bütün sahələrində siyasət, elm, təhsil, mədəniyyət, iqtisadiyyat və ailə institutunda qazandıqları uğurların qeyd olunduğu gündür.
Dünyanın bir çox ölkələrində 8 mart münasibətilə konfranslar, forumlar, sərgilər, sosial layihələr və xeyriyyə aksiyaları təşkil olunur. Gender bərabərliyi, qadınların iqtisadi imkanlarının genişləndirilməsi və liderlik mövqelərində təmsilçiliyinin artırılması əsas müzakirə mövzuları sırasında yer alır. 8 Mart günü qadınlara gül təqdim etmək gözəl ənənədir. Amma qadına ən böyük hədiyyə hörmət, dəyər və anlayışdır. Qadın yalnız bir gün deyil, hər gün sevgi və ehtiram görməlidir. Onun zəhməti görünməli, səsi eşidilməli, arzuları dəstəklənməlidir. Bu əlamətdar gündə bütün qadınları – anaları, bacıları, qızları, müəllimləri, həkimləri, həyatın hər sahəsində çalışan zəhmətkeş xanımları ürəkdən təbrik edirik. Qoy onların ömrü bahar tək təravətli, qəlbi günəş tək işıqlı olsun.
Qadın varsa, həyat var. Qadın varsa, sevgi var. Qadın varsa, dünya daha gözəldir.
Ramin Əliyev,
Yeni Azərbaycan Partiyasının məsləhətçisi
