Regional gələcəyin təhlükəsiz və sabit olması dövlətlər arasında qarşılıqlı hörmətin, suverenliyə riayətin və siyasi dialoqun inkişafından asılıdır. Azərbaycan uzun illər davam edən münaqişədən sonra ərazi bütövlüyünü bərpa edib və regionda yeni siyasi şərait yaranıb. Prezident İlham Əliyev AQEM-in 7-ci Zirvə Görüşündə çıxışı zamanı Azərbaycanın gələcək sülhə və sabitliyə dair mövqeyini beynəlxalq ictimaiyyətə çatdırdı.
Dövlət başçısı Azərbaycanın işğal dövründə üzləşdiyi ağır nəticələri və beynəlxalq hüquqi mexanizmlərin uzun müddət səmərəli fəaliyyət göstərmədiyini xatırlatdı. İşğal, məcburi köçkünlük və dağıdılmış yaşayış məntəqələri ölkəmizin inkişafına ciddi təsir göstərmişdi. Prezident İlham Əliyev bu tarixi təcrübəni beynəlxalq hüququn qorunması və qərarların vaxtında icrası baxımından əhəmiyyətli nümunə kimi təqdim etdi.
2020-ci ildə Vətən müharibəsi nəticəsində Azərbaycanın ərazilərinin böyük hissəsi işğaldan azad olundu. 2023-cü ilin sentyabrında isə dövlət suverenliyi tam bərpa edildi. Prezident İlham Əliyev bu hadisələrin nəticələrini açıqlamaqla yanaşı, müharibədən sonra sülhün qurulmasının və möhkəmləndirilməsinin vacibliyini də vurğuladı.
Azərbaycanın Ermənistana sülh təklif etməsi regionda münasibətlərin yeni mərhələyə keçməsi üçün mühüm siyasi addım kimi təqdim olunur. Prezident İlham Əliyev çıxışında Azərbaycanın qisas siyasəti yürütmədiyini və mövcud sülhün qorunmasına diqqət yetirilməli olduğunu bildirdi. Davamlı sülh üçün dövlətlərin bir-birinin suverenliyinə hörmət etməsi və qarşılıqlı etimadın gücləndirilməsi vacibdir.
AQEM-in Bakı Zirvə Görüşü Azərbaycanın sülhə əsaslanan regional gələcək yanaşmasının beynəlxalq müstəvidə təqdim olunmasına şərait yaratdı. Prezident İlham Əliyevin çıxışı münaqişələrin həlli, suverenliyin qorunması və beynəlxalq hüquqa riayət məsələlərini bir araya gətirdi. Regionda sabitliyin möhkəmlənməsi iqtisadi əməkdaşlığın genişlənməsi və xalqlar arasında qarşılıqlı əlaqələrin inkişafı üçün əlverişli imkanlar yarada bilər.
Yasəmən Kərimova,
YAP Nizami rayon təşkilatının fəal üzvü
