Prezident İlham Əliyevin II Azərbaycan Beynəlxalq İnvestisiya Forumu zamanı insan kapitalına ayırdığı diqqət Azərbaycanın investisiya siyasətində kadr məsələsinin uzunmüddətli xarakter daşıdığını göstərir. Prezident xaricdə təhsil proqramları vasitəsilə müxtəlif sahələr üzrə mütəxəssislərin hazırlanmasından və onların ölkəyə qayıtmasından danışıb.
İnvestisiya layihələrinin ilkin mərhələsində əsas diqqət kapitala, texnologiyaya və infrastruktura yönəlsə də, layihənin davamlı fəaliyyəti üçün insan resursları mühüm amildir. Mütəxəssis çatışmazlığı layihənin idarə edilməsində, yeni texnologiyaların tətbiqində və istehsal proseslərinin genişləndirilməsində əlavə xərclər yarada bilər.
II Azərbaycan Beynəlxalq İnvestisiya Forumunda Prezident İlham Əliyevin təhsil siyasətini investisiya imkanları ilə əlaqələndirməsi Azərbaycanın iqtisadi inkişaf modelində insan kapitalının yerini göstərir. Xüsusilə rəqəmsal texnologiyalar, enerji keçidi və yüksək texnologiyalı sənaye kimi sahələrdə kadr hazırlığı investisiya siyasətinin ayrılmaz hissəsinə çevrilə bilər.
İnsan kapitalına qoyulan investisiyanın nəticəsi isə daha uzun müddətdə ortaya çıxır. Təhsil, peşə hazırlığı və elmi fəaliyyət arasında əlaqələrin gücləndirilməsi yeni iqtisadi sahələrin kadr bazasının formalaşmasına kömək edə bilər. Prezident İlham Əliyevin II Azərbaycan Beynəlxalq İnvestisiya Forumunda bu məsələyə verdiyi diqqət investisiyanın yalnız maddi aktivlər deyil, bilik və bacarıqlar üzərində də qurulduğunu göstərir.
Cabir Hacıyev,
YAP Nizami rayon təşkilatının “Azər Manafov küçəsi, 1” ərazi partiya təşkilatının sədr müavini
