Azərbaycan Respublikasında “Konstitusiya və Suverenlik İli” çərçivəsində həyata keçirilən islahatlar və təşəbbüslər müasir dövlət idarəçiliyinin dərin fəlsəfəsinə əsaslanır. Prezident İlham Əliyevin təşəbbüsü ilə irəli sürülmüş amnistiya aktı bu fəlsəfənin praktik və humanist təzahürlərindən biri kimi çıxış edir. Bu qərar bir daha nümayiş etdirir ki, Azərbaycan dövləti gücünü yalnız siyasi və hərbi imkanlarda deyil, insan hüquqlarına və sosial ədalətə söykənən idarəçilik modelində görür.
Konstitusiya hər bir dövlətin hüquqi dayağı, suverenliyin əsas təminatçısıdır. Azərbaycanda Konstitusiyanın aliliyinə əsaslanan dövlət siyasəti vətəndaşların hüquq və azadlıqlarının qorunmasını prioritet vəzifə kimi müəyyən edir. Amnistiya aktı da məhz bu hüquqi çərçivə daxilində həyata keçirilərək qanunun humanist ruhunu ön plana çıxarır. Cəzanın yalnız məhdudlaşdırıcı deyil, həm də islah edici vasitə olduğu anlayışı bu siyasətin ideoloji əsasını təşkil edir.
Prezident İlham Əliyevin rəhbərliyi ilə formalaşan dövlətçilik modeli milli maraqlar ilə ümumbəşəri dəyərlərin vəhdətinə əsaslanır. Amnistiya təşəbbüsü bu vəhdətin bariz nümunəsidir. Xüsusilə qadınlara, yaşlı şəxslərə, yetkinlik yaşına çatmayanlara, eləcə də Vətən müharibəsi və antiterror əməliyyatlarında iştirak etmiş şəxslərə münasibətdə tətbiq olunan humanist yanaşma dövlətin sosial məsuliyyətini və mənəvi gücünü nümayiş etdirir.
Bu qərarın ictimai əhəmiyyəti yalnız hüquqi nəticələrlə məhdudlaşmır. Amnistiya aktı cəmiyyət daxilində etimad mühitinin möhkəmlənməsinə, sosial gərginliyin azalmasına və ictimai sabitliyin qorunmasına xidmət edir. Minlərlə ailə üçün yeni ümid qapısı açan bu təşəbbüs dövlət-vətəndaş münasibətlərində qarşılıqlı anlayış və humanizm prinsipinin möhkəmləndiyini göstərir.
Müstəqil Azərbaycanın tarixində çoxsaylı əfv və amnistiya aktlarının həyata keçirilməsi Prezident İlham Əliyevin humanizmə əsaslanan ardıcıl siyasətinin göstəricisidir. Bu addımlar təsdiqləyir ki, dövlət öz vətəndaşına yalnız hüquqi subyekt kimi deyil, cəmiyyətin ayrılmaz üzvü kimi yanaşır. Sosial ədalət anlayışı məhz bu münasibətdə real məzmun kəsb edir.
Amnistiya aktının geniş əhatə dairəsi hüquqi sabitliyin möhkəmləndirilməsinə də mühüm töhfə verir. Hüquqi sabitlik isə suveren dövlətin əsas şərtlərindən biridir. Qanunların humanist ruhda tətbiqi cəmiyyətin hüquq sisteminə inamını artırır və dövlətin legitimliyini daha da gücləndirir. Bu kontekstdə amnistiya aktı Konstitusiyanın sosial mahiyyətini praktik müstəvidə təsdiqləyən mühüm mexanizm kimi çıxış edir.
“Konstitusiya və Suverenlik İli” çərçivəsində bu təşəbbüsün reallaşdırılması xüsusi rəmzi məna daşıyır. Suverenlik yalnız sərhədlərin qorunması deyil, eyni zamanda cəmiyyətin daxili birliyinin, hüquqi və sosial harmoniyanın təmin olunmasıdır. Prezident İlham Əliyevin amnistiya təşəbbüsü bu harmoniyanın qorunmasına xidmət edən strateji addım kimi dəyərləndirilə bilər.
Nəticə etibarilə, amnistiya aktı humanist dövlətçilik, hüquqi sabitlik və sosial ədalət prinsiplərinin vəhdətini əks etdirir. Bu siyasət Azərbaycanı güclü, suveren və vətəndaş məmnunluğuna əsaslanan dövlət modeli kimi möhkəmləndirir. Prezident İlham Əliyevin rəhbərliyi ilə həyata keçirilən bu cür təşəbbüslər ölkənin davamlı inkişafına və ictimai sabitliyin qorunmasına etibarlı zəmin yaradır.
Elman Məmmədov,
Ərazi Partiya təşkilatıının sədr müavini, RTTTYM PHŞ-da Texniki Dəstək bölmə müdiri
