Azərbaycanın müasir tarixində mühüm dönüş nöqtələrindən biri, dövlət müstəqilliyinin və suverenliyinin bərpasıdır. Hər il qeyd olunan Dövlət Suverenliyi Günü, ölkənin yalnız siyasi yox, həm də hüquqi və mənəvi varlığının simvoludur. Bu gün, Azərbaycan xalqının öz taleyini sərbəst müəyyən etmək, öz dövlətçiliyini qurmaq və inkişaf etdirmək əzmini təcəssüm etdirir. Məhz bu səbəbdən, Dövlət Suverenliyi Günü Azərbaycanın mövcudluğunun və institusional davamlılığının əsas sütunu sayılır.
Suverenlik sadəcə bir dəfə qazanılan deyil, daim qorunmalı və möhkəmləndirilməli olan bir dəyərdir. Azərbaycanın müstəqilliyi bərpa olunduqdan sonra dövlət qurumlarının formalaşdırılması, hüquq sisteminin inkişafı, ordu quruculuğu və milli iqtisadiyyatın dirçəldilməsi istiqamətində mühüm addımlar atıldı. Ulu öndər Heydər Əliyevin hakimiyyətə qayıdışı ilə ölkədə siyasi sabitlik və hüquqi dövlət quruculuğu sürətləndi. Bu proses bugünkü Prezident İlham Əliyev tərəfindən davam etdirilərək Azərbaycanın həm regional, həm də beynəlxalq aləmdə nüfuzunun artmasına səbəb olub.
Sentyabrın 20-də qəbul olunan Dövlət Suverenliyi haqqında Bəyannamə Azərbaycan Respublikasının öz ərazisində tam hüquqa malik olduğunu, qanunvericilik və icra hakimiyyətinin yalnız Azərbaycan xalqına məxsusluğunu bəyan etdi. Bu sənəddə Azərbaycanın bütün təbii sərvətlərinə sahiblik hüququ təsdiqləndi, milli ordunun yaradılması və özünü müdafiə tədbirlərinin görülməsi kimi mühüm müddəalar əksini tapdı.
Bu Bəyannamə, həm də Azərbaycanın daxili və xarici siyasətində müstəqil yol tutmasının hüquqi əsaslarını formalaşdırdı. Əvvəllər Moskvanın diktəsi ilə qəbul edilən qərarların əvəzinə, artıq bütün idarəetmə sistemində xalq iradəsi ön plana keçdi. Dövlət quruculuğu prosesində əsas məqsəd demokratik, hüquqi və dünyəvi bir cəmiyyətin formalaşdırılması oldu. Əhalinin rifahının artırılması, insan hüquqlarının müdafiəsi və sosial ədalətin bərqərar olunması da bu yolun ayrılmaz hissəsinə çevrildi.
Sonrakı illərdə bu suverenlik prinsipləri yalnız kağız üzərində qalmadı, praktiki tədbirlərlə möhkəmləndirildi. Azərbaycanın beynəlxalq təşkilatlara üzv olması, xarici ölkələrlə ikitərəfli münasibətlərin qurulması və diplomatik təmsilçiliklərin açılması müstəqil dövlət imicinin formalaşmasına xidmət etdi. Xüsusilə 1994-cü ildə imzalanmış “Əsrin müqaviləsi” kimi tanınan neft sazişi Azərbaycanın iqtisadi müstəqilliyini təmin edən, suverenliyini möhkəmləndirən tarixi addım oldu.
Bütün bu proseslərin fonunda, Dövlət Suverenliyi Günü sadəcə tarixi bir hadisənin anılması yox, eyni zamanda müstəqillik ruhunun daim diri saxlanılması üçün mühüm simvolik gündür. Bu gün bizə xatırladır ki, dövlətçiliyin qorunması yalnız liderlərin deyil, hər bir vətəndaşın da mənəvi borcudur. Azərbaycan xalqı dəfələrlə sübut etmişdir ki, öz müstəqilliyinə və suverenliyinə qarşı yönələn istənilən təhdidə birlik və qətiyyətlə cavab verməyə qadirdir.
Nəticə etibarilə, Dövlət Suverenliyi Günü təkcə keçmişin qəhrəmanlıq səhifələrini deyil, həm də bu günün reallıqlarını və gələcəyin məqsədlərini ehtiva edən əlamətdar bir gündür. Suveren, güclü, müstəqil və inkişaf etmiş Azərbaycan dövlətinin təməli məhz bu kimi mühüm qərar və sənədlərlə qoyulmuşdur. Bu səbəbdən də hər il bu günün qeyd olunması milli yaddaşın gücləndirilməsi, vətənpərvərlik duyğularının aşılanması və dövlətçilik ideyalarının nəsillərə ötürülməsi baxımından xüsusi əhəmiyyət daşıyır.
İldırım Eyvazlı
YAP-ın gənc fəalı
