Azərbaycan Respublikasının Prezidenti İlham Əliyevin 15 fevral tarixində Serbiya Respublikasına rəsmi səfəri çərçivəsində verdiyi bəyanat, iki ölkə arasında formalaşmış yüksək səviyyəli münasibətlərin mahiyyətini bir daha aydın şəkildə ortaya qoydu. Dövlət başçısının çıxışı yalnız diplomatik etiket çərçivəsində deyil, həm də dərin siyasi məzmun, strateji yanaşma və qarşılıqlı hörmət prinsiplərinə əsaslanan münasibətlərin təsdiqi kimi qiymətləndirilə bilər.
Prezident İlham Əliyev çıxışında Azərbaycan ilə Serbiya arasında münasibətlərin uzun illər ərzində sınaqdan çıxmış dostluq və tərəfdaşlıq prinsiplərinə əsaslandığını xüsusi vurğuladı. Dövlət başçısının qeyd etdiyi kimi, iki ölkə liderləri arasında formalaşmış şəxsi münasibətlər də dövlətlərarası əlaqələrin möhkəmlənməsində mühüm rol oynayır. Bu kontekstdə Serbiya Prezidenti Aleksandar Vučić ilə qarşılıqlı etimada əsaslanan əlaqələr, həm siyasi dialoqun intensivləşməsinə, həm də konkret əməkdaşlıq layihələrinin həyata keçirilməsinə zəmin yaradır.
Prezident İlham Əliyev öz bəyanatında Serbiya xalqının tarix boyu dövlət suverenliyinin qorunması uğrunda apardığı mübarizəni və göstərdiyi fədakarlıqları yüksək qiymətləndirdi. Bu yanaşma, Azərbaycanın beynəlxalq münasibətlərdə prinsipial mövqeyinin – dövlətlərin ərazi bütövlüyü və suverenliyinə hörmət prinsipinin – növbəti dəfə təsdiqi kimi dəyərləndirilə bilər. Azərbaycanın özü də uzun illər ərzində suverenlik və ərazi bütövlüyü uğrunda mübarizə aparmış bir dövlət olaraq, bu məsələdə Serbiya ilə ortaq yanaşmanı bölüşür.
Çıxışda diqqət çəkən əsas məqamlardan biri də Serbiyanın müasir inkişaf modeli ilə bağlı səsləndirilən fikirlər idi. Prezident İlham Əliyev vurğuladı ki, təbii sərvətləri məhdud olan Serbiya iqtisadi və sosial sahələrdə uğurlu islahatlar həyata keçirməklə mühüm nailiyyətlər əldə etmişdir. Bu, xüsusilə Avropa məkanında yerləşən ölkə üçün əhəmiyyətli göstəricidir. Serbiyanın xarici yardımlardan asılı olmadan, öz daxili resurslarına arxalanaraq inkişaf etməsi, müasir dövlətçilik modelinin uğurlu nümunəsi kimi təqdim olundu.
Bu uğurların arxasında isə, şübhəsiz ki, güclü siyasi iradə və effektiv idarəetmə dayanır. Prezident İlham Əliyev Serbiya Prezidenti Aleksandar Vuçiçin liderlik keyfiyyətlərini xüsusi qeyd edərək, onun dövlət maraqlarını hər şeydən üstün tutmasını yüksək qiymətləndirdi. Bu fikir, həm də müasir dünyada uğurlu dövlət idarəçiliyinin əsas prinsiplərindən birinə – milli maraqların qorunması və strateji qərarların məhz bu prizma ilə verilməsinə işarə edir.
Azərbaycan və Serbiya arasında əməkdaşlıq yalnız siyasi sahə ilə məhdudlaşmır. Son illər ərzində iqtisadi, enerji, nəqliyyat, humanitar və digər sahələrdə əlaqələr dinamik şəkildə inkişaf edir. Azərbaycan Avropanın enerji təhlükəsizliyində mühüm rol oynayan ölkə kimi Serbiya üçün də etibarlı tərəfdaşdır. Eyni zamanda, Serbiyanın Balkan regionundakı mövqeyi Azərbaycan üçün bu bölgədə əlaqələrin genişləndirilməsi baxımından strateji əhəmiyyət kəsb edir.
İki ölkə arasında qarşılıqlı dəstək beynəlxalq təşkilatlar çərçivəsində də özünü aydın şəkildə göstərir. Həm Azərbaycan, həm də Serbiya müxtəlif platformalarda bir-birinin milli maraqlarını dəstəkləyir, xüsusilə suverenlik və ərazi bütövlüyü məsələlərində prinsipial mövqe nümayiş etdirirlər. Bu isə münasibətlərin yalnız dostluq deyil, həm də strateji tərəfdaşlıq səviyyəsində olduğunu təsdiqləyir.
Prezident İlham Əliyevin çıxışında səsləndirilən “biz bir-birimizi yaxından tanıyırıq, səmimi söhbətlər aparırıq və dostluq münasibətlərimiz var” fikri, iki ölkə arasındakı əlaqələrin formal çərçivələrdən kənara çıxaraq, qarşılıqlı etimad və səmimiyyət üzərində qurulduğunu göstərir. Müasir beynəlxalq münasibətlər sistemində məhz bu kimi faktorlar uzunmüddətli və dayanıqlı əməkdaşlığın əsasını təşkil edir.
Nəticə etibarilə, Azərbaycan Prezidentinin Serbiyaya səfəri və bu səfər çərçivəsində verdiyi bəyanat, iki ölkə arasında mövcud olan münasibətlərin möhkəm təməllərə söykəndiyini bir daha nümayiş etdirdi. Bu münasibətlər qarşılıqlı hörmət, bərabərlik, suverenlik prinsiplərinə sadiqlik və milli maraqların qorunması kimi dəyərlər üzərində qurulmuşdur. Gələcəkdə Azərbaycan–Serbiya əməkdaşlığının daha da genişlənəcəyi, yeni sahələri əhatə edəcəyi və regionlararası əlaqələrin inkişafına töhfə verəcəyi şübhəsizdir.

İslam Bafadarov,
Yeni Azərbaycan Partiyasının məsləhətçisi