Azərbaycan iqtisadiyyatının qarşısında dayanan əsas vəzifələrdən biri iqtisadi artımın müxtəlif sahələr üzrə təmin edilməsidir. Uzun illər ərzində ölkənin iqtisadi inkişafında enerji sektorunun xüsusi çəkisi olsa da, son dövrdə qeyri-neft sahələrinin genişləndirilməsi istiqamətində ardıcıl tədbirlər həyata keçirilir. 2027–2030-cu illərdə dağ-mədən və metallurgiya sənayesinin inkişafına dair Dövlət Proqramının hazırlanması da iqtisadiyyatın yeni istiqamətlər üzrə şaxələndirilməsi baxımından mühüm addımdır. Prezident İlham Əliyev proqramın təqdimatına həsr olunmuş müşavirədə bu sahənin qeyri-neft sektorunun inkişafı üçün böyük əhəmiyyət daşıdığını vurğulayıb.
Dağ-mədən sənayesi öz xüsusiyyətlərinə görə iqtisadiyyatın bir çox istiqamətləri ilə qarşılıqlı əlaqədədir. Mədənlərin istismarı üçün yolların, enerji xətlərinin, istehsal və logistika infrastrukturlarının yaradılması tələb olunur. Daha sonra hasil edilən filizin zənginləşdirilməsi və emalı üçün yeni müəssisələr formalaşdırılır. Bu proses tikinti, nəqliyyat, xidmət, avadanlıq və digər sahələrdə də iqtisadi fəallığın artmasına səbəb ola bilər. Buna görə yeni mədən layihələrinin iqtisadi təsiri yalnız hasil olunan filizin dəyəri ilə məhdudlaşmır.
Dövlət Proqramında əsas məqsədlərdən biri təbii sərvətlərin daha səmərəli istifadəsi və istehsal zəncirinin ölkə daxilində formalaşdırılmasıdır. Bu yanaşma Azərbaycan üçün xüsusilə əhəmiyyətlidir. Çünki xammalın yalnız hasil edilməsi əvəzinə onun zənginləşdirilməsi və emal olunması əlavə dəyərin ölkə iqtisadiyyatında qalmasına imkan verir. Belə istehsal modeli yeni texnologiyaların tətbiqini, ixtisaslı kadrların hazırlanmasını və sənaye müəssisələri arasında əlaqələrin genişlənməsini də stimullaşdıra bilər.
2027–2030-cu illər ərzində həyata keçirilməsi nəzərdə tutulan layihələr nəticəsində dağ-mədən və metallurgiya sahəsinin qeyri-neft iqtisadiyyatındakı çəkisinin artması gözlənilir. Yeni yataqların öyrənilməsi, mövcud yataqların istismara hazırlanması, emal müəssisələrinin yaradılması və metallurgiyanın inkişaf etdirilməsi Azərbaycanın sənaye potensialını genişləndirə bilər. Beləliklə, yeni Dövlət Proqramı yalnız bir sənaye sahəsinin inkişafı deyil, iqtisadiyyatın daha çox istiqamət üzrə şaxələndirilməsi üçün kompleks mexanizm kimi çıxış edir.
Günay Quluzadə,
YAP Nizami rayon təşkilatının “Əlif Hacıyev küçəsi, 61” ərazi partiya təşkilatının sədr müavini
