Prezident İlham Əliyev Davos Dünya İqtisadi Forumu çərçivəsində Çin mətbuatına verdiyi müsahibə zamanı Azərbaycan ilə Çin arasında olan ikitərəfli əlaqələrin inkişafına dair vacib açıqlamalar edib. Müsahibə, iqtisadi əlaqələrdən tutmuş, enerji sektoru, Çin-Azərbaycan münasibətlərinin gələcəyi və beynəlxalq siyasətdəki mövqelərə qədər bir çox önəmli məsələləri əhatə edir.
Azərbaycan Prezidenti İlham Əliyev Azərbaycanda həyata keçirilən infrastruktur layihələrini və regionun strateji mövqeyini vurğulayaraq, ölkəsinin Çinlə əməkdaşlığı daha da inkişaf etdirmək niyyətində olduğunu bildirib. Dövlət başçısı Çinin “Bir kəmər, bir yol” təşəbbüsünün Azərbaycan üçün böyük əhəmiyyət daşıdığını və bu təşəbbüs çərçivəsində ölkələr arasında mövcud olan nəqliyyat və ticarət imkanlarının daha da genişlənəcəyini qeyd edib. Bu təşəbbüsün, xüsusilə Azərbaycan üçün Avrasiyanın mərkəzində yerləşdiyi nəzərə alındıqda, iqtisadiyyatın gücləndirilməsi və regional əlaqələrin möhkəmləndirilməsi baxımından böyük potensiala malik olduğunu bildirib. O, həmçinin enerji sektorunda Çinlə əməkdaşlığın artdığını və bu sahədə yeni imkanların yarandığını vurğulayıb. Azərbaycanın zəngin enerji resursları ilə Çinin iqtisadiyyatına müsbət təsir göstərdiyini qeyd edən Prezident İlham Əliyev qarşıdakı illərdə bu sahədə daha geniş layihələrin həyata keçiriləcəyini bildirdi. Bu məsələdə həm də Azərbaycanın bərpa olunan enerji sektoruna diqqət ayırdığı və bu sahədə Çinin qabaqcıl texnologiyalarından yararlanma niyyətində olduğu diqqət çəkib.
Bundan başqa, Prezident İlham Əliyev Çinin Azərbaycanın beynəlxalq siyasətindəki mövqeyinə verdiyi dəstəyi yüksək qiymətləndirib. O, Çinlə münasibətlərin güclənməsinin yalnız iqtisadi sahə ilə məhdudlaşmadığını, həm də siyasi və mədəniyyət sahələrində dərinləşdiyini qeyd edib. Çin və Azərbaycan arasında mövcud olan dostluq və əməkdaşlıq münasibətlərinin, hər iki ölkə üçün faydalı bir tərəfdaşlıq yaratdığını söyləyən Prezident, bu münasibətlərin gələcəkdə daha da inkişaf edəcəyini vurğulayıb.
Müsahibəsində Azərbaycanın dünyada sülhün və sabitliyin qorunması üçün ardıcıl və konstruktiv bir yanaşma sərgilədiyini də qeyd edən cənab İlham Əliyev Azərbaycanın Çinlə strateji əməkdaşlığını davam etdirəcəyini bildirib. O, qarşılıqlı hörmət və maraqlara əsaslanan əməkdaşlığın, hər iki ölkə üçün böyük uğurlar gətirəcəyini inandığını söyləyib.
Bu müsahibə, həmçinin Azərbaycanla Çin arasındakı münasibətlərin daha da möhkəmlənməsi və dünya miqyasında hər iki ölkənin rolu barədə geniş bir perspektiv təqdim edir. Prezident İlham Əliyevin vurğuladığı kimi, bu əməkdaşlıq yalnız iqtisadi deyil, həm də mədəni və siyasi sahələrdə uğurlu nəticələrə yol açacaqdır.
Aida Əliyeva,
YAP Xəzər rayon təşkilatının məsləhətçisi
