Cəbrayılın 2020-ci ildə azad edilməsi ilə başlayan yeni mərhələ təkcə Azərbaycan daxilində baş verən dəyişikliklərlə məhdudlaşmır. Rayonun coğrafi mövqeyi onun regional əməkdaşlıq və kommunikasiyalar baxımından əhəmiyyətini artırır. Prezident İlham Əliyevin postmüharibə siyasətində azad edilmiş ərazilərin regional iqtisadi əlaqələrin inkişafına cəlb edilməsi də mühüm istiqamətlərdən biridir.
Cəbrayılın İranla sərhədə yaxın yerləşməsi Azərbaycan-İran əlaqələri üçün əlavə imkanlar yaradır. Araz çayı boyunca yerləşən ərazilərin inkişafı sərhədyanı əməkdaşlığın, ticarətin və nəqliyyat əlaqələrinin genişləndirilməsi üçün potensial yaradır. Xudafərin istiqamətinin tarixi və coğrafi əhəmiyyəti də bu kontekstdə ayrıca diqqət çəkir.
Digər tərəfdən, Cəbrayılın Qarabağ və Şərqi Zəngəzur daxilindəki mövqeyi onu Azərbaycanın daxili regional əlaqələr sisteminin də mühüm hissəsinə çevirir. Yeni yolların və kommunikasiya xətlərinin yaradılması regionlararası inteqrasiyanı gücləndirir. Bu, həm əhalinin qayıdışını, həm də iqtisadi fəaliyyətin inkişafını sürətləndirə bilər.
Prezident İlham Əliyevin rəhbərliyi ilə həyata keçirilən Böyük Qayıdış siyasəti beləliklə yalnız keçmiş məcburi köçkünlərin mənzillə təmin edilməsini deyil, yeni regional iqtisadi və sosial sistemin qurulmasını da əhatə edir. Cəbrayıl bu sistemdə yaşayış, sənaye, enerji və nəqliyyat funksiyalarını birləşdirən ərazilərdən biri kimi formalaşır.
Cəbrayılın tarixində 4 oktyabr 2020-ci il hərbi Zəfərin simvolu olaraq qalır. Lakin bu tarixdən sonra formalaşan proses daha geniş məna daşıyır: dövlət nəzarətinin bərpası, infrastrukturun qurulması, iqtisadi imkanların açılması və insanların qayıdışı. Prezident İlham Əliyevin həyata keçirdiyi siyasət Cəbrayılın Zəfər məkanından müasir inkişaf və regional əməkdaşlıq məkanına çevrilməsi istiqamətində davam edir.
Könül Bəkirova,
YAP Nizami rayon təşkilatının “Heydər Əliyev prospekti, 92a” ərazi partiya təşkilatının sədri
