21-ci əsrin informasiya müharibələri və texnoloji çağırışları ilə səciyyələndiyi bir dövrdə, media və kommunikasiya sahəsində baş verən sürətli dəyişikliklər dövlətlərin siyasətində mühüm yer tutur. Bu baxımdan Azərbaycanın təşəbbüsü ilə artıq ənənə halını almış Şuşa Qlobal Media Forumu, yalnız regional deyil, beynəlxalq informasiya mübadiləsinin təşkili və media əməkdaşlığının inkişafı üçün əhəmiyyətli platformaya çevrilmişdir.
2025-ci ilin iyul ayında keçirilən III Şuşa Qlobal Media Forumu bu tendensiyanın davamı olaraq, Prezident Cənab İlham Əliyevin iştirak və çıxışı ilə daha da aktuallaşdı. Prezidentin çıxışı bir neçə əsas istiqaməti əhatə etdi: Qarabağ məsələsində informasiya savaşının rolu, beynəlxalq media münasibətləri, süni zəkanın informasiya təhlükəsizliyinə təsiri, regional əməkdaşlıq, sülh perspektivləri və Azərbaycanın gələcəyə baxışı. Məqalədə bu istiqamətlərin hər biri ayrılıqda təhlil olunur.
Prezident Cənab İlham Əliyev çıxışında vurğuladı ki, 44 günlük Vətən müharibəsi zamanı informasiya cəbhəsi ən az real döyüş sahəsi qədər əhəmiyyətli idi. Media Azərbaycanın haqlı mövqeyini dünya ictimaiyyətinə çatdırmaqda, dezinformasiyalara qarşı mübarizə aparmaqda həlledici rol oynadı. Cənab Prezident bildirdi ki, Azərbaycan dövləti bu informasiya savaşında peşəkar və səmərəli şəkildə çıxış etməyi bacardı.
Burada xüsusilə vurğulanan məqam odur ki, informasiya siyasəti yalnız döyüş dönəmləri üçün deyil, post-müharibə dövrü üçün də önəmlidir. Azərbaycanın Şuşanı və ümumilikdə Qarabağı beynəlxalq mediaya təqdim etməsi, oradakı bərpa və quruculuq işlərinin şəffaf göstərilməsi, dövlətin informasiya siyasətində yeni bir mərhələyə keçdiyini göstərir.
Prezident qeyd etdi ki, bu forum yalnız Azərbaycanın deyil, bütün regionun informasiya təhlükəsizliyi və media əməkdaşlığı üçün mühüm platformadır. Forum, dövlətlərlə yanaşı, qeyri-hökumət təşkilatları, media qurumları və texnoloji şirkətlərin də dialoq imkanlarını genişləndirmək məqsədi daşıyır.
Prezident Əliyevin çıxışında xüsusi yer tutan məsələlərdən biri də süni zəkanın informasiya mühitinə təsiri idi. O qeyd etdi ki, süni zəka vasitəsilə saxta xəbərlər, deepfake videolar və səs manipulyasiyaları təkcə ictimai sabitlik üçün deyil, diplomatik münasibətlər üçün də təhlükə mənbəyidir.
Azərbaycan bu istiqamətdə beynəlxalq əməkdaşlığın vacibliyini vurğulayaraq, süni zəkanın tənzimlənməsi və informasiya təhlükəsizliyinin təmin olunması üçün qlobal səviyyəli hüquqi mexanizmlərin yaradılmasını təklif edir. Prezident qeyd etdi ki, bu texnologiyanın inkişafı müsbət olduğu qədər təhlükəlidir və bu səbəbdən etik çərçivələrin formalaşdırılması vacibdir.
Çıxışın digər vacib hissəsi regional layihələr və geosiyasi reallıqlara həsr olunmuşdu. Prezident Cənab Əliyev Zəngəzur dəhlizinin təkcə Azərbaycan üçün deyil, bütövlükdə Cənubi Qafqaz və Avrasiya üçün strateji əhəmiyyət daşıdığını bildirdi. Bu layihə Azərbaycanı Orta Asiyadan Avropaya uzanan ticarət yollarının mərkəzinə çevirir.
Prezident həmçinin vurğuladı ki, Azərbaycanın müstəqil və çoxşaxəli xarici siyasəti regional stabillik və inkişaf üçün nümunəvi model təqdim edir.
Çıxışın sülhə dair hissəsində Cənab Prezident bildirdi ki, Azərbaycan sülh müqaviləsinin imzalanmasında maraqlıdır, lakin Ermənistanın konstitusiyasında Azərbaycana qarşı ərazi iddialarının aradan qaldırılması bu prosesin irəliləməsi üçün zəruridir.
O qeyd etdi ki, beynəlxalq vasitəçilərlə aparılan danışıqlar nəticə yönümlü olmalı, siyasi manipulyasiyalara alət edilməməlidir. Prezidentin bu çağırışı yalnız regional sülh üçün deyil, Cənubi Qafqazda davamlı təhlükəsizlik və əməkdaşlıq üçün real mexanizmlərin formalaşması baxımından da əhəmiyyətlidir.
Rüstəmov Bəhruz,
Yeni Azərbaycan Partiyası, məsləhətçi
