Azərbaycan idmanının 2025-ci il üzrə yekunlarına həsr olunmuş tədbir ölkədə idman sahəsinin mövcud vəziyyətinin qiymətləndirilməsi ilə yanaşı, bu istiqamətdə gələcək hədəflərin müəyyənləşdirildiyi mühüm ictimai-siyasi hadisə kimi dəyərləndirildi. Mərasim çərçivəsində Azərbaycan Respublikasının Prezidenti İlham Əliyevin çıxışı idmanın dövlət siyasətində tutduğu xüsusi yeri, bu sahəyə göstərilən davamlı diqqəti və inkişafın əsas istiqamətlərini aydın şəkildə ortaya qoydu.
Prezidentin səsləndirdiyi mövqelər bir daha təsdiqlədi ki, idman Azərbaycanda təkcə rəqabət və nəticə anlayışı deyil, eyni zamanda cəmiyyətin sağlamlığı və ölkənin beynəlxalq mövqeyinin gücləndirilməsi baxımından strateji əhəmiyyət daşıyır.Dövlət başçısı çıxışında Azərbaycan idmançılarının beynəlxalq turnirlərdə qazandıqları uğurlara toxunaraq bildirdi ki, bu nailiyyətlərin əsasında planlı və ardıcıl dövlət siyasəti dayanır. Son illər ərzində ölkənin müxtəlif bölgələrində yaradılan müasir idman infrastrukturu, yeni idman obyektlərinin istifadəyə verilməsi və federasiyaların fəaliyyətinə göstərilən dəstək idmanın sistemli inkişafına geniş imkanlar açıb
.Prezident İlham Əliyev xüsusi olaraq gənc nəslin idman sahəsində formalaşdırılmasının vacibliyini önə çəkdi və vurğuladı ki, uzunmüddətli uğurlar məhz bu istiqamətdə görülən işlərdən asılıdır. Uşaqların və yeniyetmələrin idmana marağının artırılması, onların sağlam həyat tərzinə təşviq edilməsi yalnız idman məqsədləri daşımır, eyni zamanda cəmiyyətin sosial və mənəvi sağlamlığının təmin olunmasına xidmət edir.
Çıxış zamanı idmançı və məşqçi heyətinin rolu da xüsusi qeyd olundu. Prezident vurğuladı ki, Azərbaycan idmançıları beynəlxalq yarışlarda iştirak edərkən yalnız peşəkarlıq nümayiş etdirmir, həm də milli dəyərləri, vətənpərvərlik ruhunu və dövlətçilik mövqeyini təmsil edirlər. Bu yanaşma Azərbaycan idmanının beynəlxalq aləmdə tanınmasında mühüm rol oynayır.
Çıxışının yekununda Prezident İlham Əliyev idman ictimaiyyətinə gələcək fəaliyyətlərində uğurlar arzulayaraq, dövlətin bu sahəyə dəstəyinin davamlı olacağını bəyan etdi. Dövlət başçısının fikirləri 2025-ci il üzrə idman nəticələrini yekunlaşdırmaqla yanaşı, qarşıdakı mərhələlər üçün əsas istiqamətləri müəyyən edən konseptual baxış kimi dəyərləndirildi. Ümumilikdə, bu çıxış idmanın Azərbaycanda dövlət siyasətinin prioritet sahələrindən biri olduğunu bir daha təsdiqlədi. Prezident İlham Əliyevin ortaya qoyduğu siyasi iradə və sistemli yanaşma sayəsində Azərbaycan idmanının gələcək illərdə də beynəlxalq arenada mövqelərini gücləndirəcəyi və yeni nailiyyətlər əldə edəcəyi gözlənilir.
Siyasət Həsənov,
YAP Xəzər rayon təşkilatının məsləhətçisi
