28 May 2025-ci il tarixində Azərbaycan Respublikasının Prezidenti İlham Əliyev xalqı Müstəqillik Günü münasibətilə təbrik edib. Prezident çıxışında 1918-ci ildə Şərqdə ilk demokratik respublikanın qurulmasını Azərbaycanın tarixində dönüş nöqtəsi kimi qiymətləndirib. O, Azərbaycan Xalq Cümhuriyyətinin müasir dövlətçilik ənənələrinin əsasını qoyduğunu xüsusi vurğulayıb.
Cənab İlham Əliyev Azərbaycanın bu günkü gücünü və müstəqilliyinin dayanıqlığını məhz həmin təmələ bağlayaraq, dövlətin suverenliyinin qorunmasında milli birliyin vacibliyini qeyd edib. Prezident çıxışında Azərbaycanın hərbi və iqtisadi gücündən, həmçinin regional liderliyindən də bəhs edib. O, ölkənin beynəlxalq nüfuzunun artmasında müstəqil siyasət yürütməyin əhəmiyyətini bir daha diqqətə çatdırıb.
Prezidentin çıxışı zamanı xüsusi vurğulanan məqamlardan biri də gənc nəslin vətənpərvər ruhda yetişdirilməsinin zəruriliyi oldu. İlham Əliyev qeyd edib ki, Müstəqillik Günü yalnız tarixi bir hadisə deyil, həm də hər bir azərbaycanlının qürur və məsuliyyət günüdür. Dövlət başçısı vətəndaşları bu əziz gün münasibətilə təbrik edərək, Azərbaycanın daim müstəqil və qüdrətli olacağına əminliyini ifadə edib. Bu çıxış həm tarixi yaddaşın təzələnməsi, həm də müasir çağırışlara cavab verən bir baxış kimi qiymətləndirildi. Prezident İlham Əliyevin 28 Mayda verdiyi mesaj, milli irsə sədaqətin və dövlətçilik ideyalarının daşıyıcısı kimi böyük əhəmiyyət daşıyır.
Ələkbər Novruzov,
YAP Xəzər rayon təşkilatının fəalı
