“Prezident İlham Əliyevin Şimali Makedoniya Prezidenti Qordana Silyanovska-Davkova ilə görüşü iki ölkə arasındakı strateji tərəfdaşlığın dərinləşdiyini göstərir. Bu səfər çərçivəsində aparılan müzakirələr siyasi, iqtisadi, enerji və humanitar sahələrdə əməkdaşlığın genişləndirilməsinə yönəlmişdir. Azərbaycan və Şimali Makedoniya arasında diplomatik münasibətlər 1995-ci ildən qurulub və bu günə qədər qarşılıqlı səfərlər və görüşlər vasitəsilə möhkəmlənib. Dövlət başçılarının son görüşü bu münasibətlərin yeni mərhələyə qədəm qoyduğunu nümayiş etdirir. Görüş zamanı Prezident İlham Əliyev iki ölkə arasında iqtisadi əlaqələrin inkişaf etdirilməsinin vacibliyini vurğulayıb və investisiya imkanlarının araşdırılmasının zəruriliyini qeyd edib. Hər iki ölkənin dövlət qurumlarının sıx təmasda olması ticari əlaqələrin inkişafına töhfə verə bilər”.
Bunu “Globalnews.az”a açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, son dövrlərdə iki ölkə arasında enerji sahəsində əməkdaşlıq güclənib. Azərbaycan artıq Şimali Makedoniyaya təbii qaz ixrac etməyə başlayıb və gələcəkdə bu tədarükün artırılması planlaşdırılır. Təsadüfi deyil ki, Azərbaycan enerji sektorunda genişmiqyaslı layihələr həyata keçirir və Avropanın enerji təhlükəsizliyində mühüm rol oynayır. Eyni zamanda, Azərbaycan və Şimali Makedoniya arasında humanitar və mədəni əlaqələrin genişləndirilməsi də diqqət mərkəzindədir. Prezident İlham Əliyev Şimali Makedoniya Prezidentinin Azərbaycana səfəri çərçivəsində mədəni tədbirlərdə iştirak etməsini və ölkəmizin humanitar sahədə əməkdaşlığa önəm verməsini yüksək qiymətləndirib. Bu istiqamətdə tələbələr arasında əlaqələrin qurulması və akademik mübadilə proqramlarının təşviqi də mühüm əhəmiyyət kəsb edir.
Onun sözlərinə görə, Azərbaycan və Şimali Makedoniya arasındakı münasibətlər hər iki ölkənin strateji maraqlarına uyğun inkişaf edir. Prezident İlham Əliyevin qeyd etdiyi kimi, siyasi, iqtisadi və enerji sahəsində əməkdaşlığın dərinləşməsi bu münasibətləri daha da möhkəmləndirəcək. Humanitar əlaqələrin genişləndirilməsi isə xalqlar arasında dostluq və qarşılıqlı anlaşmanı gücləndirəcək. Bu görüş iki ölkə arasında əməkdaşlığın yeni səhifəsinin açıldığını nümayiş etdirir.
