Fevralın 10-da Azərbaycan Respublikasının Prezidenti İlham Əliyev ilə Amerika Birləşmiş Ştatlarının Vitse-prezidenti Ceyms D. Vance arasında Bakıda keçirilən görüş və mətbuat üçün verilən bəyanatlar, Azərbaycan–ABŞ münasibətlərinin yeni çağını nümayiş etdirir. Bu səfər, iki ölkə arasında strateji tərəfdaşlıq gündəliyinin möhkəmləndirilməsi istiqamətində mühüm addımlardan biridir və Prezident Əliyevin verdiyi bəyanat bu yeni mərhələnin mahiyyətini dəqiq şəkildə ifadə edir. Prezident İlham Əliyev vurğuladı ki, Vitse-prezident Vensin Azərbaycana rəsmi səfəri ölkəmiz üçün böyük şərəfdir. Azərbaycan rəhbərliyi ABŞ-la münasibətləri yüksək qiymətləndirir və Tramp-Vens administrasiyasının müsbət münasibətinə görə minnətdarlığını xüsusi qeyd etdi. İkitərəfli gündəlikdəki məsələlərin geniş müzakirə olunduğunu bildirən Prezident, bu görüşün Strateji Tərəfdaşlıq haqqında Xartiyanın imzalanması mərasimi ilə nəticələndiyini bildirdi ki, bu da altı ay ərzində hər iki ölkənin heyətləri tərəfindən aparılan gərgin işin nəticəsidir.
Azərbaycan-ABŞ Strateji Tərəfdaşlıq Xartiyası, Bakı və Vaşinqton arasında münasibətləri “tamamilə yeni mərhələyə” qaldırmaq potensialına malik geniş çərçivə sənədidir. Prezident Əliyev dedi ki, bu sənəd iki ölkə arasında əməkdaşlığın iqtisadi, təhlükəsizlik, enerji, texnologiya və digər sahələrdə daha da genişlənməsinə imkan yaradacaq. Azərbaycan üçün dünyanın ən qüdrətli ölkəsi olan ABŞ ilə strateji tərəfdaş olmaq böyük bir şərəf və məsuliyyətdir. Prezident Əliyev ABŞ-ın regionda sülh prosesinə verdiyi töhfəyə də diqqət çəkdi. 2025-ci ilin avqustunda Ağ Evdə imzalanmış sülh sazişini xatırladan dövlət başçısı, bu sənədin Ermənistan və Azərbaycan arasında uzun illərdən bəri davam edən münaqişədən sonra sülh və sabitliyin təmin olunması istiqamətində mühüm addım olduğunu vurğuladı. Artıq altı aydır ki, Azərbaycan sülh şəraitində yaşayır və bu yeni reallığa uyğunlaşmağı öyrənir. Prezident Əliyev həmçinin regionda nəqliyyat və iqtisadi əlaqələrin inkişaf etdirilməsi istiqamətində TRIPP — “Beynəlxalq Sülh və Rifah naminə Tramp Marşrutu” layihəsinin rolunu qeyd etdi. Bu layihə Azərbaycanın iki hissəsini birləşdirəcək və genişmiqyaslı daşımalar dəhlizi kimi Asiya ilə Avropanı birləşdirəcəkdir. Bu, yalnız iki ölkənin dostluğunu deyil, həm də regional inteqrasiyanın daha geniş perspektivini ifadə edir.
Bəyanatda həmin marşrutun ticarət əlaqələrinin genişləndirilməsində və regionda iqtisadi stabilliyin gücləndirilməsində mühüm rol oynayacağına diqqət yetirildi. Azərbaycan artıq Ermənistan vasitəsilə yük tranzitini həyata keçirir və neft məhsullarının təchizatını təmin edir ki, bu da regionda ticarət və əməkdaşlıq üçün yeni perspektivlər açır. Strateji əməkdaşlıq yalnız iqtisadi sahədə məhdudlaşmır. Prezident Əliyev qeyd etdi ki, bu tərəfdaşlıq təhlükəsizlik, enerji təhlükəsizliyi və yeni texnologiyalar sahəsində də geniş perspektivlər açacaq. ABŞ ilə əlaqələr vasitəsilə innovasiya, süni intellekt, data mərkəzləri və digər qabaqcıl sahələrdə birgə layihələr həyata keçirilə bilər ki, bu da Azərbaycan üçün yeni inkişaf imkanları deməkdir. Prezident vurğuladı ki, altı ay ərzində əldə olunan irəliləyişlər iki ölkənin rəhbərlərinin – həm Azərbaycan Prezidenti İlham Əliyevin, həm də ABŞ Prezidentinin – bu əməkdaşlığın inkişafına verdiyi prioritetlərin nəticəsidir. Bu əməkdaşlıq müstəvisində hər iki tərəf bir-biri ilə qarşılıqlı hörmət və etimad əsasında işləyir və bu, əlaqələrin davamlı dərinləşməsi üçün zəmin yaradır. Prezident Əliyevin bəyanatı göstərir ki, Azərbaycan ABŞ ilə münasibətlərə böyük önəm verir və bu əlaqələrin geniş spektrdə davamlı inkişafına sadiqdir. Strateji Tərəfdaşlıq Xartiyası, regional sülh və sabitliyin gücləndirilməsi, iqtisadi əməkdaşlığın genişləndirilməsi, və texnoloji sahələrdə birgə təşəbbüslər bu münasibətlərin əsas xüsusiyyətləri kimi diqqətə layiqdir. Bu səfər və mətbuat üçün verilən bəyanatlar göstərir ki, Azərbaycan və ABŞ arasında münasibətlər qarşılıqlı fayda və regionun təhlükəsizliyi üçün geniş perspektivlər vəd edir.
Murad Zeynalov,
Yeni Azərbaycan Partiyası,Məsləhətçi
