2025-ci il mayın 20-də Azərbaycan Respublikasının Prezidenti Cənab İlham Əliyev Macarıstana işgüzar səfər etmişdir. Bu səfər çərçivəsində o, Macarıstanın Baş naziri Viktor Orban ilə ikitərəfli görüş keçirmiş və daha sonra birgə mətbuat konfransında bəyanatla çıxış etmişdir. Görüşün əsas mövzularından biri Azərbaycan-Macarıstan münasibətlərinin strateji səviyyəyə çatdırılması və gələcək əməkdaşlıq istiqamətlərinin müəyyənləşdirilməsi olmuşdur. Prezident İlham Cənab Əliyev çıxışında Macarıstanla münasibətlərin yüksək səviyyədə olduğunu qeyd edərək, bu ölkənin Azərbaycanın Avropa İttifaqı ilə əlaqələrində xüsusi yer tutduğunu vurğulamışdır. O, Macarıstanın Azərbaycanın ərazi bütövlüyünə daim verdiyi dəstəyə görə təşəkkür etmişdir. Azərbaycan və Macarıstan strateji tərəfdaş statusuna malikdir və bu tərəfdaşlıq enerji, nəqliyyat, təhsil və humanitar sahələrdə real layihələr əsasında inkişaf etdirilir. Ən vacib müzakirə mövzularından biri enerji sahəsində əməkdaşlıq olmuşdur. Prezident Cənab İlham Əliyev Azərbaycanın Avropaya, o cümlədən Macarıstana təbii qaz ixracını genişləndirmək niyyətində olduğunu bildirmişdir. 2023-cü ildən etibarən Macarıstan Azərbaycandan təbii qaz almağa başlamış və bu, Avropanın enerji təhlükəsizliyinə töhfə verən mühüm addım kimi qiymətləndirilmişdir. O qeyd etmişdir ki, bu əməkdaşlıq Cənub Qaz Dəhlizi çərçivəsində həyata keçirilir və bu dəhliz Avropa bazarına alternativ enerji marşrutu təqdim edir. Prezident İlham Cənab Əliyev nəqliyyat sahəsində əməkdaşlığın da sürətlə inkişaf etdiyini bildirmişdir. Azərbaycanın tranzit imkanları və Orta Dəhliz (Transxəzər Beynəlxalq Nəqliyyat Marşrutu) üzərindən yüklərin daşınması məsələləri diqqət mərkəzində olmuşdur. O, Macarıstan şirkətlərini bu dəhlizin imkanlarından istifadə etməyə dəvət etmişdir. Azərbaycanın infrastruktur potensialı – dəmir yolları, limanlar və avtomobil yolları – regional və qlobal nəqliyyat sisteminə inteqrasiya üçün əlverişli zəmin yaradır. Prezident İlham Cənab Əliyev bəyanatında təhsil sahəsindəki əməkdaşlığı da yüksək qiymətləndirmişdir. Hal-hazırda 200-dən çox azərbaycanlı tələbə Macarıstanda dövlət proqramı çərçivəsində təhsil alır. Bu, yalnız akademik inkişaf deyil, həm də mədəni əlaqələrin möhkəmləndirilməsi baxımından strateji əhəmiyyət kəsb edir. Hər iki lider qarşılıqlı mübadilə proqramlarının davam etdirilməsi və daha geniş təhsil təşəbbüslərinin təşviq olunması barədə razılığa gəliblər. Azərbaycanın azad olunmuş ərazilərində minatəmizləmə prosesi də görüşdə əsas müzakirə mövzularından biri olmuşdur. Prezident İlham Cənab Əliyev Macarıstanın bu sahədəki texnoloji və praktiki təcrübəsini yüksək qiymətləndirərək, bu sahədə əməkdaşlığın genişləndirilməsinin vacibliyini vurğulamışdır. Azərbaycan tərəfi bu dəstəyi Qarabağ və Şərqi Zəngəzurda yenidənqurma və bərpa işlərinə mühüm töhfə kimi qiymətləndirir.
Rüstəmov Bəhruz
Yeni Azərbaycan Partiyası, məsləhətçi
