Azərbaycan xalqının müstəqillik arzusu və dövlətçilik ənənələri qədim zamanlara, əsrlər boyunca formalaşan milli kimlik və dövlət quruculuğu təcrübələrinə əsaslanır. 28 May 1918-ci il tarixi isə bu ənənələrin ən mühüm mərhələsi, xalqımızın müasir müstəqil dövlətçilik tarixinin başlanğıcı kimi milli yaddaşımızda əbədi iz qoymuşdur.
28 May 1918-ci ildə Azərbaycan Xalq Cümhuriyyəti elan edildi. Bu, müsəlman Şərqində ilk demokratik respublika olmaqla, dünya miqyasında da azsaylı parlamentli dövlətlərdən biri idi.
Azərbaycanın dövlətçilik ənənələri qədim dövrlərə gedib çıxır. Orta əsrlərdə Azərbaycanın siyasi mərkəzləri olmuş Şirvanşahlar, Atabəylər və Səfəvilər dövlətləri milli idarəetmə və suverenlik təcrübələrini özündə cəmləşdirirdi. Səfəvilər dövründə milli dövlətçilik ideyaları inkişaf etmiş, azərbaycanlıların dini və milli kimliyi möhkəmlənmişdir.
Lakin XX əsrin əvvəllərində milli dövlətçilik ənənələri yeni məzmun qazandı. Azərbaycanın siyasi elitası müstəqil dövlət quruculuğunu əsas hədəf kimi müəyyən etdi. Azərbaycan Xalq Cümhuriyyəti 23 ay kimi qısa müddətdə demokratik təsisatları yaratdı: parlament, hökumət, ordu və hüquqi baza formalaşdı, milli azlıqların hüquqları tanındı, qadınlara seçki hüququ verildi.
28 May tarixi Azərbaycan xalqının müstəqillik uğrunda mübarizəsinin simvoludur. Bu tarix Azərbaycan xalqının dövlətçilik ənənələrini bərpa etməsi və dünyada öz yerini tutması üçün dönməz mərhələdir.
Sovetlər Birliyi dövründə milli dövlətçilik ideyaları təzyiq altında olsa da, Azərbaycan xalqı milli kimliyini və azadlıq istəyini itirmədi. 1991-ci ildə Sovet İttifaqının süqutundan sonra Azərbaycan müstəqilliyini yenidən bərpa etdi və 28 May tarixi bu müstəqilliyin ruhunu canlandırdı.
Bu gün 28 May Azərbaycan üçün həm milli dövlətçilik ənənələrinin təntənəsi, həm də müasir dövlətçilik strategiyalarının inkişaf etdiyi gündür. Dövlətimizin quruculuğu və möhkəmlənməsi yolunda bu günün tarixi əhəmiyyəti daha da artır.
Azərbaycanın milli dövlətçilik ənənələri yalnız tarixi keçmişə bağlı deyil, həm də gələcəyə yönəlmiş strategiyadır. Müasir dövrdə milli dövlətçilik konsepsiyası dövlətin suverenliyinin qorunması, iqtisadi və mədəni inkişaf, demokratik institutların gücləndirilməsi və gənclərin siyasi proseslərdə iştirakı ilə sıx bağlıdır.
Gənclərimizin milli dəyərlərə bağlılığı və vətənpərvərlik ruhunun inkişaf etdirilməsi, dövlət idarəçiliyində onların fəal iştirakı Azərbaycanın gələcək inkişafının əsas amillərindən biridir. Bu baxımdan 28 May tarixi yalnız keçmişimizin parlaq səhifəsi deyil, həm də müstəqil Azərbaycanın inkişafında hər bir vətəndaş üçün ruhlandırıcı nümunədir.
Orxan Abdullazadə,
Yeni Azərbaycan Partiyası, məsləhətçi
