Dayanıqlı sülh dövlətlərin təhlükəsizliyini, iqtisadi inkişafını və xalqlar arasında əməkdaşlığı təmin edən əsas siyasi şərtlərdən biridir. Münaqişələrdən sonra yaranan yeni reallıqların hüquqi çərçivədə tənzimlənməsi uzunmüddətli sabitliyin təmin olunması baxımından xüsusi əhəmiyyət daşıyır. Azərbaycan Respublikasının Konstitusiyası dövlətin suverenliyini, ərazi bütövlüyünü və hüquqi qaydanı əsas prinsiplər kimi müəyyənləşdirərək sülh siyasətinin hüquqi dayaqlarını formalaşdırır.
Azərbaycan uzun illər Ermənistanın işğalçılıq siyasəti nəticəsində münaqişə şəraitində yaşamağa məcbur olub. Bu vəziyyət ölkənin iqtisadi inkişafına, regional əməkdaşlıq imkanlarına və milyonlarla insanın sosial həyatına mənfi təsir göstərib. Beynəlxalq hüququn ərazi bütövlüyü və sərhədlərin toxunulmazlığı prinsipləri Azərbaycanın hüquqi mövqeyinin əsasını təşkil edib.
2020-ci ildə Vətən müharibəsində əldə edilən Zəfər və 2023-cü ildə suverenliyin tam bərpası regionda yeni siyasi şərait formalaşdırıb. Azərbaycan artıq öz ərazisində dövlət hakimiyyətini tam həyata keçirmək və bütün bölgələrdə konstitusion hüquq qaydasını təmin etmək imkanına malikdir. Bu reallıq münaqişədən sonrakı mərhələdə münasibətlərin hüquqi əsaslarla qurulması üçün yeni imkanlar yaradır.
Prezident İlham Əliyevin rəhbərliyi ilə Azərbaycan regionda sülhün və əməkdaşlığın təmin olunması istiqamətində mövqeyini ardıcıl şəkildə ifadə edir. Sərhədlərin delimitasiyası, kommunikasiyaların açılması, iqtisadi əlaqələrin genişləndirilməsi və qarşılıqlı etimadın yaradılması regional sabitliyin əsas istiqamətlərindəndir. Bu proseslərin beynəlxalq hüquqa və dövlətlərin suverenliyinə hörmət əsasında həyata keçirilməsi mühüm şərtdir.
Konstitusion dövlətçilik prinsipləri Azərbaycanın sülh və təhlükəsizlik siyasətinin əsas hüquqi çərçivəsini təşkil edir. Dayanıqlı sülhün təmin edilməsi üçün siyasi iradə ilə yanaşı, hüquqi öhdəliklərin yerinə yetirilməsi və qarşılıqlı etimadın möhkəmləndirilməsi vacibdir. Azərbaycan üçün əsas məqsəd əldə olunmuş tarixi nəticələri regionda uzunmüddətli sabitliyə və iqtisadi tərəqqiyə çevirməkdir.
Əminə Kərimova,
YAP Nizami rayon təşkilatının “Nəsimi küçəsi, 34” ərazi partiya təşkilatının sədri
