Şuşa Zəfəri – Azərbaycan xalqının bir yumruq kimi birləşdiyi günlərin nəticəsi
Azərbaycan xalqının tarixində milli həmrəyliyin böyük gücə çevrildiyi hadisələr az olmayıb. 2020-ci ildə baş vermiş Vətən müharibəsi bu birliyin ən parlaq nümunələrindən biri oldu. Ölkənin bütün bölgələrində yaşayan insanlar, müxtəlif peşə sahibləri və xaricdəki soydaşlarımız vahid məqsəd ətrafında birləşərək Ordumuza və dövlətimizə dəstək verdilər.
Prezident İlham Əliyevin rəhbərliyi ilə aparılan müharibə dövründə xalq və dövlət birliyi qələbənin əsas mənəvi dayaqlarından birinə çevrildi. Dövlət başçısının qətiyyətli mövqeyi, hərbi əməliyyatların uğurlu gedişi və xalqın nümayiş etdirdiyi həmrəylik Azərbaycanın gücünü artırdı. Şuşanın azad edilməsi bu birliyin ən mühüm nəticələrindən biri oldu.
Şuşa uğrunda döyüşlərdə iştirak edən hərbçilərimizin qəhrəmanlığı xalqın dəstəyi ilə daha da güclənirdi. Arxa cəbhədə çalışan insanlar, könüllülər, həkimlər və digər mütəxəssislər ümumi qələbəyə öz töhfələrini verirdilər. Hər kəs anlayırdı ki, bu mübarizə yalnız torpaq uğrunda deyil, həm də milli ləyaqət və gələcək nəsillərin taleyi uğrundadır.
Şuşanın azad edilməsi xəbəri bütün ölkədə milli sevinc və həmrəylik yaratdı. İnsanlar Azərbaycan Bayrağı altında birləşərək bu tarixi hadisəni böyük coşqu ilə qeyd etdilər. Bu qələbə xalqın öz dövlətinə və ordusuna olan inamını daha da möhkəmləndirdi.
Bu gün Şuşanın inkişafı da həmin milli birliyin davamını tələb edir. Şəhərin qorunması, tarixi irsinin yaşadılması və yeni nəslin vətənpərvərlik ruhunda yetişdirilməsi ümumi məsuliyyətimizdir. Şuşa Şəhəri Günü birlik və həmrəyliyin xalqı böyük qələbələrə apardığını bir daha sübut edir.
Nahidə Rzayeva,
YAP Nizami rayon təşkilatının “Keşlə qəsəbəsi, Köndələn küçəsi” ərazi partiya təşkilatının sədr müavini
