Şuşa Azərbaycan xalqının milli kimliyini, tarixi yaddaşını, zəngin mədəniyyətini və mənəvi bütövlüyünü özündə yaşadan müqəddəs şəhərlərimizdən biridir. Qarabağın dilbər guşəsində, möhtəşəm dağların qoynunda qərarlaşan bu qədim şəhər əsrlər boyu Azərbaycanın ictimai-siyasi, mədəni və ədəbi həyatında mühüm yer tutmuşdur. Şuşanın hər daşı, hər küçəsi, hər tarixi abidəsi xalqımızın keçmişindən xəbər verir, milli ruhumuzun, dövlətçilik ənənələrimizin və zəngin irsimizin canlı salnaməsi kimi bu gün də öz əzəmətini qoruyur. 8 Noyabr – Şuşa Şəhəri Günü isə bu tarixi irsin yenidən dirçəlişinin, milli qürurumuzun və tarixi ədalətin təntənəsinin rəmzidir.
2020-ci il noyabrın 8-də Azərbaycan Ordusunun qəhrəmanlığı, əsgər və zabitlərimizin misilsiz şücaəti nəticəsində Şuşa şəhərinin işğaldan azad edilməsi Vətən müharibəsinin ən möhtəşəm hadisələrindən biri oldu. Sıldırım qayaları, çətin relyefi və mürəkkəb döyüş şəraiti ilə seçilən Şuşanın azadlığı Azərbaycan əsgərinin gücünü, iradəsini və Vətən sevgisini bütün dünyaya nümayiş etdirdi. Bu tarixi qələbə yalnız hərbi uğur deyil, həm də xalqımızın sarsılmaz birliyinin, milli həmrəyliyinin və dövlətimizin qüdrətinin parlaq təzahürü idi. Müzəffər Ali Baş Komandan İlham Əliyevin rəhbərliyi ilə qazanılan bu Zəfər Azərbaycan tarixinin ən şanlı səhifələrindən birinə çevrildi.
Bu gün Şuşada aparılan genişmiqyaslı bərpa və quruculuq işləri şəhərin əvvəlki şöhrətinin qaytarılmasına xidmət edir. Tarixi abidələr bərpa olunur, küçələr yenilənir, mədəniyyət ocaqları yenidən fəaliyyətə başlayır, doğma yurda qayıdan sakinlər üçün müasir yaşayış şəraiti yaradılır. Şuşanın yenidən Azərbaycanın mədəniyyət paytaxtı kimi inkişaf etməsi, beynəlxalq tədbirlərə ev sahibliyi etməsi onun təkcə ölkəmiz üçün deyil, bütün türk və İslam dünyası üçün əhəmiyyətini bir daha təsdiqləyir. Xarıbülbül festivalı, Vaqif Poeziya Günləri və digər mədəni tədbirlər şəhərin zəngin mənəvi irsini dünyaya tanıdır.
8 Noyabr – Şuşa Şəhəri Günü hər bir azərbaycanlının qəlbində qürur, sevinc və minnətdarlıq hissləri oyadır. Bu əlamətdar gün bizə Vətən uğrunda canından keçən şəhidlərimizin müqəddəs xatirəsini ehtiramla yad etməyi, qazilərimizin fədakarlığını unutmamağı və tarixi Zəfərimizin qədrini bilməyi xatırladır. Şuşanın azadlığı xalqımızın yenilməz ruhunun təntənəsidir. Bu gün əminliklə deyə bilərik ki, Şuşa əbədi olaraq Azərbaycanın ayrılmaz hissəsi, milli qürurumuzun və dövlətçilik iradəmizin sarsılmaz rəmzi olaraq yaşayacaqdır.
Adil Hüseynov,
YAP Xəzər rayon təşkilatının fəalı
