Azərbaycan Respublikasının Prezidenti İlham Əliyevin 2026-cı il oktyabrın 27-də Bakıda keçirilən VII Ümumdünya Mədəniyyətlərarası Dialoq Forumunda səsləndirdiyi fikirlər milli-mənəvi dəyərlərin qorunması, tarixi irsin yaşadılması və müasir cəmiyyətin inkişafı baxımından xüsusi əhəmiyyət daşıyır. Dövlət başçısının “Biz nəinki öz ənənələrimizi, öz həyat tərzimizi qoruyub saxladıq, o cümlədən onları gücləndirdik” fikri Azərbaycanın milli kimliyə münasibətini, keçmişlə gələcək arasında yaratdığı möhkəm əlaqəni ifadə edir.
Hər bir xalqın dünya xalqları arasında özünəməxsus yer tutması onun tarixi yaddaşı, mənəvi sərvətləri, dili, mədəniyyəti və həyat tərzi ilə sıx bağlıdır. Bu amillər yalnız keçmişdən miras qalan dəyərlər deyil, eyni zamanda cəmiyyətin gələcək inkişafına istiqamət verən mühüm mənəvi dayaqlardır. Azərbaycan xalqı əsrlər boyunca formalaşmış ənənələrini qoruyaraq milli kimliyini yaşatmış, müxtəlif tarixi mərhələlərdə üzləşdiyi çətinliklərə baxmayaraq, özünəməxsusluğunu itirməmişdir.
Azərbaycanın milli-mənəvi irsi xalqın gündəlik həyatında, ailə münasibətlərində, qonaqpərvərlik ənənələrində, böyüklərə hörmət, kiçiklərə qayğı, qarşılıqlı yardım və həmrəylik kimi dəyərlərdə özünü göstərir. Bu xüsusiyyətlər cəmiyyətin mənəvi bütövlüyünü möhkəmləndirir, insanlar arasında etimadın və qarşılıqlı anlaşmanın formalaşmasına şərait yaradır. Milli ənənələrin qorunması da məhz onların yalnız keçmişin xatirəsi kimi deyil, müasir həyatın ayrılmaz hissəsi kimi yaşadılması ilə mümkündür.
Azərbaycanın müstəqillik dövründə həyata keçirdiyi mədəniyyət siyasəti milli irsin qorunmasına və onun beynəlxalq miqyasda tanıdılmasına geniş imkanlar yaradıb. Tarixi abidələrin bərpası, muzeylərin fəaliyyətinin inkişaf etdirilməsi, milli musiqinin, xalçaçılığın, muğam sənətinin, aşıq yaradıcılığının və digər mədəniyyət nümunələrinin təbliği bu istiqamətdə görülən işlərin mühüm tərkib hissəsidir. Bu fəaliyyət xalqın zəngin mədəni irsinin gələcək nəsillərə çatdırılmasına xidmət edir.
Milli dəyərlərin yaşadılması müasir inkişaf proseslərindən kənarda qalmaq demək deyil. Əksinə, Azərbaycan təcrübəsi göstərir ki, ənənələrə bağlılıq yeniliyə açıq olmaqla uzlaşa bilər. Müasir texnologiyaların, təhsilin, elmin və rəqəmsal imkanların genişləndiyi bir dövrdə milli mədəniyyətin qorunması onun yeni vasitələrlə təbliğini də zəruri edir. Gənc nəslin tarixi irsi öyrənməsi, ana dilinə hörmətlə yanaşması və milli mədəniyyətin daşıyıcısı kimi yetişməsi bu baxımdan mühüm əhəmiyyət kəsb edir.
Milli kimliyin qorunması həm də qloballaşmanın yaratdığı çağırışlar qarşısında mənəvi dayanıqlığın təmin edilməsidir. Müxtəlif mədəniyyətlərin bir-birinə daha çox yaxınlaşdığı müasir dünyada xalqların öz dəyərlərinə sahib çıxması onların beynəlxalq münasibətlərdə daha aydın mövqedən çıxış etməsinə imkan verir. Öz tarixi və mədəni irsinə hörmət edən cəmiyyət digər xalqların mənəvi sərvətlərinə də daha həssas yanaşır.
Azərbaycanın milli ənənələrini qorumaqla yanaşı, onları gücləndirməsi dövlətçilik şüurunun möhkəmlənməsinə, cəmiyyətin mənəvi birliyinin qorunmasına və gələcək nəsillərin milli köklər üzərində yetişməsinə xidmət edir. Bu yanaşma göstərir ki, xalqın tərəqqisi yalnız iqtisadi və texnoloji nailiyyətlərlə ölçülmür. Mənəvi dəyərlərin davamlılığı, tarixi yaddaşın qorunması və mədəni irsin yaşadılması da güclü cəmiyyətin əsas göstəricilərindəndir.
Almaz Rəhimova,
YAP Xətai rayon təşkilatı fəalı
