Dağ-mədən və metallurgiya sənayesinin inkişafı yeni mərhələdə
Sentyabrın 22-də Azərbaycan Respublikasının Prezidenti İlham Əliyevin sədrliyi ilə dağ-mədən və metallurgiya sənayesinin inkişafına dair Dövlət Proqramına həsr olunmuş müşavirə keçirilib. Müşavirədə Azərbaycanın mineral resurslarından daha səmərəli istifadə olunması, dağ-mədən və metallurgiya sənayesinin inkişaf etdirilməsi, yeni istehsal imkanlarının yaradılması və bu sahənin ölkə iqtisadiyyatındakı rolunun artırılması ilə bağlı mühüm məsələlər müzakirə edilib.
Prezident İlham Əliyev çıxışında dağ-mədən və metallurgiya sənayesini ölkə iqtisadiyyatı üçün perspektivli sahələrdən biri kimi qiymətləndirib. Dövlət başçısı bildirib ki, bu istiqamətdə hazırlanmış Dövlət Proqramının təsiri yalnız mədən və metallurgiya sektoru ilə məhdudlaşmayacaq. İstehsalın artması ilə yükdaşımalar və logistika xidmətlərinə tələbatın yüksəlməsi, yerli podratçı və təchizatçı şirkətlər üçün yeni imkanların yaranması, yeni sənaye sahələrinin formalaşması gözlənilir.
Dövlət Proqramının mühüm istiqamətlərindən biri yerli xammal və yarımfabrikat bazasının genişləndirilməsi, bunun əsasında yüksək əlavə dəyər yaradan istehsal sahələrinin inkişaf etdirilməsidir. Bu proses həm sənayenin şaxələndirilməsinə, həm də yerli istehsal imkanlarının genişlənməsinə xidmət edə bilər.
Müşavirədə qeyd olunub ki, dağ-mədən və metallurgiya sektorunun inkişafı yeni iş yerlərinin yaradılması və regionlarda iqtisadi fəallığın artırılması baxımından da əhəmiyyət daşıyır. Eyni zamanda, ixtisaslı kadrlara tələbatın artması texniki bilik və bacarıqların inkişafına, elmi və peşəkar potensialın gücləndirilməsinə imkan yaradacaq.
Dövlət Proqramının hazırlanması istiqamətində mühüm addım Prezident İlham Əliyevin 2026-cı il 1 aprel tarixli Sərəncamı olub. Həmin sənəddə xammaldan son məhsula qədər dəyər zəncirinin inkişaf etdirilməsi, mineral resurslardan səmərəli istifadə, yüksək əlavə dəyər yaradan metal emalının genişləndirilməsi və metallurgiya məhsullarının ixrac potensialının artırılması əsas məqsədlər sırasında müəyyənləşdirilib.
Sentyabrın 23-də isə “Azərbaycan Respublikasında dağ-mədən (metal filizləri) və metallurgiya sənayesinin inkişafına dair 2027–2030-cu illər üçün Dövlət Proqramı” Prezidentin Sərəncamı ilə təsdiq edilib. Sənədə əsasən, proqramın tədbirlərinin əlaqələndirilməsi və icrasına nəzarət Nazirlər Kabinetinə həvalə olunub, monitorinq və qiymətləndirmənin həyata keçirilməsi isə İqtisadi İslahatların Təhlili və Kommunikasiya Mərkəzinə tapşırılıb.
Yeni Dövlət Proqramı Azərbaycanın sənaye siyasətində mineral resursların daha səmərəli istifadəsinə və emal imkanlarının genişləndirilməsinə yönəlmiş mühüm sənədlərdən biridir. Qarşıdakı illərdə bu sahədə həyata keçiriləcək layihələrin yeni istehsal zəncirlərinin yaranmasına, investisiya və ixrac imkanlarının genişlənməsinə, regionlarda məşğulluğun və iqtisadi fəallığın artmasına töhfə verməsi nəzərdə tutulur.
Beləliklə, dağ-mədən və metallurgiya sənayesinin inkişafı Azərbaycanın qeyri-neft sektorunun şaxələndirilməsi, sənaye potensialının gücləndirilməsi və ölkənin mineral-xammal bazasının iqtisadi dövriyyəyə daha səmərəli cəlb edilməsi baxımından qarşıdakı dövrün mühüm istiqamətlərindən biri kimi müəyyənləşir.
Selcan Novruzova,
YAP Nizami rayon təşkilatının məsləhətçisi
