Azərbaycan Respublikasının Prezidenti İlham Əliyevin 31 iyul 2026-cı ildə Qırğızıstan Respublikasına həyata keçirdiyi dövlət səfəri Azərbaycan–Qırğızıstan münasibətlərinin inkişafında mühüm siyasi hadisə kimi dəyərləndirilir. Səfər çərçivəsində keçirilən görüşlər, aparılan müzakirələr, imzalanan sənədlər və dövlət başçılarının mətbuata verdikləri bəyanatlar iki qardaş ölkə arasında əlaqələrin yüksələn xətt üzrə inkişaf etdiyini bir daha nümayiş etdirdi.
Azərbaycan və Qırğızıstan xalqları ortaq tarixi köklərə, dil və mədəni yaxınlığa, mənəvi dəyərlərə malikdirlər. Bu ortaq bağlar ölkələrimiz arasında münasibətlərin möhkəm təməlini təşkil edir. Müasir dövrdə həmin tarixi və mənəvi yaxınlıq dövlətlərarası münasibətlərdə də öz əksini tapır, qarşılıqlı hörmətə, etimada və əməkdaşlığa əsaslanan yeni imkanlar yaradır. Prezident İlham Əliyevin Qırğızıstana dövlət səfəri zamanı mətbuata verdiyi bəyanat Azərbaycan–Qırğızıstan əlaqələrinin mövcud vəziyyətini və gələcək inkişaf istiqamətlərini aydın şəkildə ifadə etdi. Dövlətimizin başçısı iki ölkə arasında münasibətlərin yüksək səviyyədə olduğunu vurğulayaraq, Azərbaycan ilə Qırğızıstanın dostluq və qardaşlıq münasibətlərinin gələcəkdə daha da möhkəmlənəcəyinə əminliyini bildirdi.
Müasir beynəlxalq münasibətlər sistemində dövlətlər arasında etibarlı siyasi dialoq böyük əhəmiyyət daşıyır. Azərbaycan ilə Qırğızıstan arasında siyasi münasibətlər qarşılıqlı hörmət və bərabərlik prinsipləri üzərində qurulub. Dövlət başçıları arasında müntəzəm görüşlər, müxtəlif səviyyələrdə aparılan danışıqlar və beynəlxalq təşkilatlar çərçivəsində əməkdaşlıq əlaqələrin daha da genişlənməsinə şərait yaradır.
Prezident İlham Əliyevin mətbuata bəyanatında səsləndirilən fikirlər göstərir ki, Azərbaycan və Qırğızıstan yalnız ikitərəfli münasibətlər çərçivəsində deyil, həm də regional və beynəlxalq məsələlərdə oxşar mövqelər nümayiş etdirirlər. Hər iki dövlət beynəlxalq hüququn prinsiplərinə, dövlətlərin suverenliyinə və ərazi bütövlüyünə hörmətlə yanaşır. Azərbaycan və Qırğızıstanın Türk Dövlətləri Təşkilatı çərçivəsində fəal əməkdaşlığı da xüsusi əhəmiyyət daşıyır. Türk dünyasının birliyinin möhkəmləndirilməsi, ortaq dəyərlərin qorunması və dövlətlər arasında siyasi, iqtisadi, mədəni əlaqələrin genişləndirilməsi hər iki ölkənin xarici siyasətində mühüm istiqamətlərdən biridir. Azərbaycanın Türk dünyasının inkişafı və həmrəyliyinin gücləndirilməsi istiqamətində həyata keçirdiyi siyasət Qırğızıstan tərəfindən yüksək qiymətləndirilir. Eyni zamanda, Qırğızıstanın Türk dünyası daxilində fəal mövqeyi ümumi əməkdaşlığın daha da genişlənməsinə mühüm töhfə verir.
Prezident İlham Əliyevin Qırğızıstana dövlət səfəri zamanı iqtisadi əməkdaşlıq məsələləri də diqqət mərkəzində olub. Azərbaycan və Qırğızıstan arasında iqtisadi əlaqələrin genişləndirilməsi, ticarət dövriyyəsinin artırılması, qarşılıqlı investisiyaların təşviqi və yeni birgə layihələrin həyata keçirilməsi üçün geniş imkanlar mövcuddur. Ölkələrimiz arasında iqtisadi əməkdaşlıq yalnız mövcud sahələrlə məhdudlaşmır. Nəqliyyat, logistika, enerji, kənd təsərrüfatı, turizm, sənaye və rəqəmsal texnologiyalar istiqamətində əməkdaşlığın inkişafı gələcək üçün mühüm perspektivlər yaradır.
Azərbaycanın əlverişli coğrafi mövqeyi, müasir nəqliyyat infrastrukturu və beynəlxalq logistika imkanları Qırğızıstan üçün də yeni əməkdaşlıq perspektivləri açır. Orta Dəhlizin inkişafı, Şərq ilə Qərbi birləşdirən nəqliyyat marşrutlarının genişləndirilməsi və yükdaşımaların artırılması bütün region ölkələrinin iqtisadi maraqlarına cavab verir.
Azər Ağayev,
YAP Tərtər rayon təşkilatının sədr müavini
