2026-cı il mayın 4-də Prezident İlham Əliyevin “Avropa Siyasi Birliyi”nin 8-ci Zirvə toplantısında videobağlantı vasitəsilə çıxışı Azərbaycanın regionda formalaşdırdığı yeni reallıqları bir daha beynəlxalq ictimaiyyətin diqqətinə çatdırdı. Bu çıxış təkcə diplomatik bəyanat deyil, həm də ölkənin sülhə, əməkdaşlığa və dayanıqlı inkişafa verdiyi töhfələrin sistemli təqdimatı idi.
Son dövrlərdə Azərbaycan və Ermənistan arasında münasibətlərdə müşahidə olunan müsbət dinamika regionda sabitliyin möhkəmləndirilməsi baxımından mühüm əhəmiyyət kəsb edir. Ermənistanın 2028-ci ildə keçiriləcək Zirvə toplantısının Azərbaycanda təşkil olunmasını dəstəkləməsi tərəflər arasında etimadın formalaşdığını göstərir. Bu fakt onu deməyə əsas verir ki, uzun illər davam edən qarşıdurmadan sonra tərəflər artıq sülh şəraitində birgə yaşamağın yollarını axtarır.
Azərbaycanın sülh təşəbbüsləri yalnız siyasi bəyanatlarla məhdudlaşmır. Praktiki addımlar da bu siyasətin əsasını təşkil edir. Ölkənin öz ərazisi vasitəsilə Ermənistana tranzit imkanlarını açması, minlərlə ton yükün daşınmasına şərait yaratması, həmçinin enerji resurslarının ixracına başlaması regionda iqtisadi əməkdaşlığın yeni mərhələyə qədəm qoyduğunu göstərir. Bu addımlar qarşılıqlı asılılığı artırmaqla yanaşı, sülhün möhkəmlənməsinə xidmət edir.
Bununla yanaşı, bəzi Avropa institutlarının Azərbaycan-Ermənistan münasibətlərinə yanaşmasında müşahidə olunan ikili standartlar narahatlıq doğurur. Xüsusilə Avropa Parlamenti və AŞPA tərəfindən qəbul edilən birtərəfli qərarlar regionda əldə olunan nailiyyətlərin kölgədə qalmasına səbəb olur. Halbuki, sülh prosesinə dəstək vermək beynəlxalq təşkilatların əsas prioriteti olmalıdır.
Prezident İlham Əliyevin çıxışı bir daha göstərdi ki, Azərbaycan yalnız öz milli maraqlarını deyil, eyni zamanda regionun ümumi təhlükəsizliyini və rifahını da nəzərə alır. Sülh gündəliyinə sadiqlik və real addımlar ölkənin beynəlxalq nüfuzunu daha da gücləndirir.
Cəlal Abdullayev,
Xəzər rayonunun gənc fəalı,
Milli Aviasiya Akademiyasının I kurs tələbəsi
