9 Noyabr – Azərbaycan Respublikasının Dövlət Bayrağı Günü xalqımızın milli qürurunun, dövlətçiliyimizin və müstəqilliyimizin təntənəsi kimi qeyd olunur. Bu gün təkcə üçrəngli bayrağımızın rəsmi dövlət atributu kimi qəbul edildiyi tarix deyil, həm də xalqımızın azadlıq, birlik və dövlətçilik ideallarının simvoludur. Məhz Ümummilli Lider Heydər Əliyevin uzaqgörən siyasəti nəticəsində dövlət rəmzlərimiz – bayraq, gerb və himn Azərbaycan Respublikasının müstəqil dövlət kimi formalaşmasında mühüm rol oynamışdır.
Azərbaycanın üçrəngli bayrağı ilk dəfə 1918-ci ildə Azərbaycan Xalq Cümhuriyyəti dövründə qəbul olunmuşdur. Lakin 1920-ci ildə Cümhuriyyətin süqutundan sonra bu bayraq uzun illər qadağan edilmiş, onun qaldırılması belə cəzalandırılmışdı. Yalnız 1990-cı illərin əvvəllərində milli azadlıq hərəkatı zamanı bu müqəddəs rəmz yenidən xalqımızın həyatına qayıtdı. Bu mərhələdə Heydər Əliyevin rolu xüsusilə əvəzsiz idi.
1990-cı ilin noyabrında – hələ Azərbaycan müstəqil dövlət elan edilməmişdən öncə – Naxçıvan Muxtar Respublikası Ali Məclisinin sessiyasında Heydər Əliyev tarixi təşəbbüslə çıxış edərək, üçrəngli bayrağımızın Naxçıvan Muxtar Respublikasının dövlət bayrağı kimi qəbul edilməsini təklif etdi. Bu qərar təkcə bir region üçün deyil, bütövlükdə Azərbaycan xalqı üçün böyük mənəvi dönüş nöqtəsi oldu. Ulu Öndərin təşəbbüsü ilə həmin vaxt Naxçıvanda SSRİ-nin rəmzləri endirilərək, onların yerinə Azərbaycan Xalq Cümhuriyyətinin üçrəngli bayrağı ucaldıldı. Bu hadisə müstəqilliyin bərpası yolunda atılmış cəsarətli və simvolik addım idi.
Heydər Əliyevin bu təşəbbüsü Azərbaycan dövlətçiliyinin bərpası prosesində milli ideologiyanın əsas sütunlarından birinə çevrildi. O, sonralar müstəqil Azərbaycan Respublikasının Prezidenti kimi çıxış edərkən də daim vurğulayırdı ki, “Azərbaycan bayrağı bizim dövlətimizin, millətimizin rəmzidir. Onu uca tutmaq, qorumaq və gələcək nəsillərə ötürmək hər bir azərbaycanlının borcudur.”
Ümummilli Liderin rəhbərliyi ilə qəbul edilən qərarlar nəticəsində 1993-cü ildən etibarən Azərbaycanın bütün bölgələrində dövlət rəmzlərinə hörmət ənənəsi formalaşdı. Bu siyasət nəticəsində bayraq dövlətin ayrılmaz simvoluna çevrildi, hər bir vətəndaş üçün qürur və vətənpərvərlik mənbəyi oldu.
2009-cu ildə Prezident İlham Əliyevin sərəncamı ilə 9 Noyabr tarixi – Azərbaycan Respublikasının Dövlət Bayrağı Günü elan olundu. Bu qərar Ulu Öndər Heydər Əliyevin dövlətçilik ideyalarının məntiqi davamı kimi böyük əhəmiyyət daşıyır.
Bu gün Azərbaycan bayrağı dünya arenasında – beynəlxalq təşkilatlarda, idman yarışlarında, sülhməramlı missiyalarda və ən əsası, azad Qarabağ torpaqlarında dalğalanır. Bu, Heydər Əliyevin əsasını qoyduğu milli dövlətçilik ənənələrinin, xalqın birliyi və müstəqilliyə sarsılmaz inamının parlaq göstəricisidir.
Azərbaycanın üçrəngli bayrağı bu gün hər birimizin qəlbində və şüurunda azadlıq, müstəqillik və milli kimlik rəmzidir. Onun ucalığı və əzəməti Ümummilli Lider Heydər Əliyevin xalqımıza bəxş etdiyi müstəqil dövlətçilik irsinin ən parlaq təcəssümüdür.
Günel Əbdürəhmanova
Yeni Azərbaycan Partiyası, məsləhətçi
