Azərbaycan tarixində elə günlər var ki, xalqın yaddaşına əbədi həkk olunur, milli qürurun, dövlətin gücünün və ədalətin təntənəsi kimi yaşadılır. 4 oktyabr – Cəbrayıl şəhərinin işğaldan azad edildiyi gün də məhz belə tarixi günlərdən biridir. 2020-ci ildə baş vermiş Vətən müharibəsində Azərbaycan Ordusu Ali Baş Komandan İlham Əliyevin rəhbərliyi ilə parlaq qələbələr qazandı və bu qələbələr sırasında Cəbrayılın azad olunması xüsusi əhəmiyyət daşıdı. Bu gün artıq hər il “Cəbrayıl şəhəri günü” kimi qeyd edilir və işğaldan azad olunmuş torpaqlarımızda həyatın bərpası istiqamətində atılan addımların simvoluna çevrilib.Cəbrayıl rayonu Azərbaycanın Qarabağ bölgəsinin mühüm coğrafi ərazilərindən biridir. Zəngin təbiəti, məhsuldar torpaqları, qədim yaşayış məskənləri ilə tarix boyu seçilən Cəbrayıl eyni zamanda strateji mövqeyə malikdir. Ermənistan silahlı qüvvələri 1993-cü ildə bu rayonu işğal etmiş, şəhər və kəndlər tamamilə dağıdılmış, tarixi abidələr yerlə-yeksan olunmuşdu. Təxminən 27 il ərzində Cəbrayıl işğal altında qaldı, lakin Azərbaycan xalqı heç vaxt bu torpaqlardan əl çəkmədi, ədalətin bərpa olunacağı günə inanaraq yaşadı.44 günlük Vətən müharibəsi Azərbaycan tarixində yeni qəhrəmanlıq səhifəsi yazdı. Həmin günlərin ən önəmli hadisələrindən biri 4 oktyabr 2020-ci ildə Cəbrayıl şəhərinin və onlarla kəndin azad olunması oldu. Bu xəbər xalqımızda böyük sevinc və ruh yüksəkliyi yaratdı. Prezident İlham Əliyev xalqa müraciətində “Cəbrayıl şəhəri azaddır!” sözlərini elan edərkən bütün Azərbaycan bu qələbəni birlikdə qeyd etdi. Bu həm hərbi-strateji baxımdan mühüm nailiyyət idi, həm də xalqın 30 ilə yaxın davam edən nisgilinə son qoyan ədalət zəfəri idi.Cəbrayıl uğrunda döyüşlər Azərbaycan əsgər və zabitlərinin fədakarlığının, xalq-ordu birliyinin təntənəsi oldu. Şəhidlərimizin qanı, qazilərimizin igidliyi sayəsində Cəbrayıl azadlığa qovuşdu. Bu gün Cəbrayıl şəhəri günü yalnız qələbə bayramı deyil, həm də şəhidlərin ruhuna ehtiram günüdür. Hər bir vətəndaş bu günü qeyd edərkən həmin qəhrəmanların xatirəsini minnətdarlıqla yad edir.Azərbaycan dövləti azad edilmiş bütün ərazilərdə olduğu kimi, Cəbrayılda da geniş quruculuq və bərpa işləri həyata keçirir. Şəhərin yeni baş planı hazırlanıb, yollar, körpülər, elektrik və su xətləri çəkilir, müasir infrastruktur yaradılır. Artıq “ağıllı kənd” layihələri reallaşdırılır, yeni yaşayış kompleksləri inşa olunur. Məqsəd Cəbrayılı əvvəlkindən daha gözəl, daha müasir şəhərə çevirməkdir. Bu, həm də köçkünlərin doğma torpaqlarına qayıdışı üçün möhkəm zəmin yaradır.Cəbrayıl şəhəri günü həm də gələcəyə inam günüdür. Azad edilmiş torpaqlarda həyat yenidən canlanır, kənd təsərrüfatı, sənaye və turizm imkanları inkişaf etdirilir. Regionun strateji mövqeyi Cəbrayılı gələcəkdə iqtisadi mərkəzlərdən birinə çevirməyə imkan verəcək. Dövlətin həyata keçirdiyi layihələr həm tarixi ədaləti bərpa edir, həm də yeni inkişaf mərhələsinin əsasını qoyur.4 oktyabr yalnız bir şəhərin işğaldan azad olunma tarixi deyil, həm də Azərbaycan xalqının mübarizə əzminin, dövlətimizin gücünün, ordumuzun qəhrəmanlığının təcəssümüdür. Bu gün Cəbrayıl şəhəri günü kimi qeyd olunur və hər bir azərbaycanlı üçün qürur mənbəyinə çevrilir. Şəhərin bərpası, insanların doğma yurdlarına qayıdışı isə bu tarixi qələbənin ən böyük bəhrəsi olacaq. Cəbrayılın azadlığı Azərbaycan tarixinin ən parlaq səhifələrindən biri kimi əbədi yaşayacaq.
Murad Zeynalov
Yeni Azərbaycan Partiyası,Məsləhətçi
