2025-ci il iyulun 4-ü Azərbaycan tarixinə növbəti qürurverici gün kimi daxil oldu. Prezident İlham Əliyevin təşəbbüsü və yüksək siyasi iradəsi ilə Şərqi Zəngəzurun incisi olan Xankəndi şəhəri bu dəfə beynəlxalq səviyyəli tədbirə – İqtisadi Əməkdaşlıq Təşkilatının (İƏT) 17-ci Zirvə görüşünə ev sahibliyi etdi. Bu tədbir təkcə diplomatik arenada Azərbaycanın nüfuzunun artdığını göstərməklə qalmadı, həm də azad edilmiş ərazilərin sürətli bərpası və reinteqrasiyasının rəmzinə çevrildi. İƏT Zirvə görüşünün məhz Xankəndidə keçirilməsi Azərbaycan dövlətinin suverenliyinin tam bərpası və ərazi bütövlüyünün təmin olunmasının real nəticəsidir. Bu şəhərin seçilməsi təkcə coğrafi və logistik amillərlə deyil, həm də siyasi və simvolik baxımdan olduqca əhəmiyyətlidir. Prezident İlham Əliyevin də qeyd etdiyi kimi, artıq Qarabağda və Şərqi Zəngəzurda həyat qayıdır və bu ərazilər beynəlxalq əməkdaşlıq platformalarına çevrilir. Prezidentin çıxışında vurğuladığı kimi, Azərbaycan regionda sabitliyin, əməkdaşlığın və inkişafın tərəfdarıdır. Zirvə görüşünün Xankəndidə keçirilməsi həm də İƏT-ə üzv ölkələrin Azərbaycanın haqlı mövqeyinə və ərazi bütövlüyünə verdiyi dəstəyin növbəti nümayişi oldu.
Zirvə görüşündə Prezident İlham Əliyev mühüm məqamlara toxundu. Onun nitqi Azərbaycanın regional və qlobal iqtisadi platformalardakı yeri və rolu haqqında aydın təsəvvür yaratdı. Prezident qeyd etdi ki, İƏT çərçivəsində nəqliyyat, enerji, ticarət və kənd təsərrüfatı sahələrində əməkdaşlıq gücləndirilməlidir. Xüsusilə Zəngəzur dəhlizinin açılması ilə bağlı mesajlar təşkilata üzv ölkələr üçün yeni perspektivlər təqdim etdi. Azərbaycanın təşəbbüsü ilə regionda yaradılan müasir infrastruktur – limanlar, dəmir yolları, magistral yollar və yaşıl enerji layihələri – artıq İƏT məkanının tranzit və logistika xəritəsini dəyişməkdədir. Prezidentin çağırışları – “dayanıqlı inkişaf”, “regional inteqrasiya”, “bərabərhüquqlu əməkdaşlıq” – təşkilatın gələcək strateji xəttinə yön vermək baxımından böyük əhəmiyyət kəsb edir.
Zirvə çərçivəsində qəbul edilən sənədlər və razılaşmalar, xüsusilə Xankəndi Bəyannaməsi, Azərbaycanın İƏT-dəki lider rolunu bir daha təsdiqlədi. Artıq İƏT-in iqtisadi xəritəsində Azərbaycan həm enerji təminatçısı, həm də nəqliyyat qovşağı kimi mərkəzi mövqedədir. Xankəndi şəhərinin qısa müddət ərzində bərpa olunması, müasir şəhərsalma prinsiplərinə əsasən qurulması və regionun inkişaf mərkəzinə çevrilməsi Azərbaycanın iqtisadi potensialının real göstəricisidir. Bu da İƏT üzv dövlətləri üçün örnək model rolunu oynayır – post-münaqişə dövründə dirçəliş və inkişafın mümkünlüyünü sübut edir. Zirvə görüşü bir daha sübut etdi ki, Azərbaycan öz gücünü dağıdıcılıqdan yox, quruculuqdan alır. Prezident İlham Əliyevin rəhbərliyi ilə ölkəmiz yalnız hərbi qələbə qazanmaqla kifayətlənmədi – bu qələbə sosial-iqtisadi dirçəlişə, regional əməkdaşlığa və sülhə xidmət edir. Azərbaycan İƏT platformasında bu ideyaları təşviq edir: əməkdaşlıq, dialoq, qarşılıqlı maraqlar və ortaq gələcək. Bu baxımdan Xankəndidə keçirilən 17-ci Zirvə görüşü həm də gələcək nəsillərə sülh içində yaşamaq və əməkdaşlıq etmək mesajı verdi.
Xankəndidə keçirilən İƏT Zirvə görüşü Prezident İlham Əliyevin siyasi uzaqgörənliyinin, diplomatik bacarığının və prinsipial mövqeyinin parlaq təcəssümüdür. Azərbaycan artıq təkcə regionun deyil, qlobal səviyyədə də güclü oyunçu kimi qəbul edilir. Bu Zirvə görüşü həm də bir çağırışdır – İƏT daxilində daha sıx əməkdaşlıq, qarşılıqlı hörmət və davamlı inkişafa aparan yolun davamı üçün yeni imkanların qapısını açır. Xankəndi 2025-ci ildə sadəcə bir şəhər deyil – regional əməkdaşlığın simvolu, Azərbaycanın yeni inkişaf mərhələsinin aynasıdır.
Mirsadıq Səməndərli,
Yeni Azərbaycan Partiyası, məsləhətçi
