Prezident İlham Əliyev 2025-ci il iyulun 2-də keçirilən mətbuat konfransında çıxışı zamanı Özbəkistanda həyata keçirilən genişmiqyaslı islahatlara diqqət çəkərək, bu prosesləri böyük maraq və sevinc hissi ilə izlədiklərini bildirdi. Onun sözlərinə görə, Özbəkistanın son illərdə keçdiyi inkişaf yolu yalnız daxili tərəqqi deyil, həm də bölgə üçün ilhamverici nümunədir. Bu dəyişikliklər dövlət idarəçiliyindən tutmuş sosial təminata qədər müxtəlif sahələri əhatə edir.
İlham Əliyev vurğuladı ki, Prezident Şavkat Mirziyoyevin rəhbərliyi ilə ölkədə hüquqi, iqtisadi və sosial sahələrdə aparılan çevik islahatlar, xalqın rifahının artırılmasına yönəlmiş real addımlarla müşayiət olunur. Xüsusilə korrupsiya ilə mübarizə, sahibkarlığın inkişafı, vətəndaş cəmiyyəti institutlarının gücləndirilməsi sahəsində atılan addımlar mühüm nəticələr verir. Bu yanaşma Özbəkistanı yeni dövrün müasir və çevik dövlət modelinə çevirir.
Azərbaycan Prezidenti qeyd etdi ki, bu uğurlu islahat kursu regionda sabitliyə və qarşılıqlı əməkdaşlığa müsbət təsir göstərir. İki ölkə arasında əməkdaşlıq da məhz bu dəyişikliklərin yaratdığı yeni imkanlar fonunda daha da genişlənməkdədir. Əliyev əlavə etdi ki, Özbəkistanın əldə etdiyi nəticələr Azərbaycan üçün də maraqlı təcrübədir və tərəflər bu sahədə təcrübə mübadiləsinə açıqdır.
Sonda İlham Əliyev bildirdi ki, Özbəkistanın hərtərəfli inkişafı təkcə ölkə daxilində deyil, həm də beynəlxalq aləmdə yüksək qiymətləndirilir. O, bu transformasiyanın davamlı olacağına əminliyini ifadə edərək, Azərbaycan xalqının Özbəkistanın uğurlarını böyük dost məhəbbəti ilə izlədiyini söylədi.
Sünbül Həsənquliyeva
YAP Xəzər rayon təşkilatının fəalı
