2025-ci ilin aprel ayının 2-də Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri iki ölkə arasında strateji əməkdaşlığın daha da möhkəmləndirilməsi baxımından mühüm əhəmiyyət daşıdı. Azərbaycan Respublikasının Prezidenti İlham Əliyevin yüksək səviyyəli qonaqla görüşü zamanı bir sıra regional və qlobal məsələlər müzakirə edildi, ortaq maraqlara xidmət edən fikirlər səsləndirildi. Prezident İlham Əliyev mətbuat üçün verdiyi bəyanatda bu səfərin münasibətlərə yeni müsbət təkan verəcəyini qeyd etdi və əməkdaşlığın dərinləşməsinə dair nikbin mesajlar verdi.
Bəyanatın diqqətçəkən məqamlarından biri Azərbaycanın 30 il ərzində Ermənistanın işğalına məruz qalması və bu müddət ərzində beynəlxalq hüququn pozulmasına baxmayaraq, Azərbaycanın sülh və ədalət yolundan dönməməsi ilə bağlı idi. Prezident İlham Əliyev vurğuladı ki, Azərbaycanın işğal altında qalmış əraziləri 2020-ci ildə keçirilən 44 günlük Vətən müharibəsi nəticəsində azad edildi və ölkə öz ərazi bütövlüyünü tam bərpa etdi. Bu, həm hüquqi, həm də mənəvi baxımdan Azərbaycanın haqlı mövqeyinin təsdiqi idi.
Mətbuat qarşısında çıxış zamanı Prezident İlham Əliyev eyni zamanda Azərbaycanın COP29 beynəlxalq iqlim konfransına ev sahibliyi etməsinin qürurverici hadisə olduğunu bildirdi. Bu tədbirin yüksək səviyyədə keçirilməsi, ölkənin beynəlxalq nüfuzunun artmasının, həmçinin ekoloji siyasətə verdiyi önəmin göstəricisi kimi dəyərləndirildi. Azərbaycan bu platformada yalnız təşkilatçı ölkə deyil, həm də ekoloji məsuliyyətin daşıyıcısı kimi çıxış etdi və inkişaf etməkdə olan ölkələrin maraqlarını müdafiə etmək üçün konkret təşəbbüslərlə çıxış etdi. Səfər çərçivəsində Azərbaycan-Almaniya münasibətlərinin gələcək inkişaf perspektivləri də ön plana çəkildi. Xüsusilə, yaşıl enerji, nəqliyyat, sənaye və texnologiya sahələrində əməkdaşlığın genişləndirilməsi istiqamətində razılıqlar əldə olundu. Bu, Azərbaycanın Avropa ilə daha sıx inteqrasiyası və iqtisadi sahədə müasir standartlara uyğun inkişafı üçün əhəmiyyətli mərhələ kimi qiymətləndirilə bilər.
Prezident İlham Əliyevin mətbuata verdiyi bəyanat, Azərbaycanın həm sülh, həm inkişaf, həm də ekoloji məsuliyyət yolunda ardıcıl və prinsipial siyasət yürütdüyünü bir daha təsdiqlədi. Bu səfər təkcə ikitərəfli münasibətlərə deyil, həm də Azərbaycanın beynəlxalq səviyyədə artan roluna güclü impuls verdi.
Nigar Cəlalova,
YAP Xəzər rayon təşkilatının fəalı
