Müzəffər Azərbaycan ordusunun qəhrəmanlığı sayəsində Xocalı şəhidlərinin qanı yerdə qalmadı
Xocalı soyqırımı, 26 fevral 1992-ci ildə Ermənistan silahlı qüvvələri tərəfindən törədilən və Azərbaycan xalqının tarixinə dərin iz buraxan ən dəhşətli faciələrdən biridir. Bu soyqırımda 613 nəfər mülki şəxs – qadın, uşaq və qocalar daxil olmaqla, amansızcasına qətlə yetirildi. Xocalının azadlıq arzuları isə illər boyunca millətin yaddaşında ədalətin təcəlli etməsi üçün yanğılı bir çağırış oldu.
Azərbaycan Ordusunun Vətən müharibəsindəki qəhrəmanlığı Xocalının intiqamını almaq üçün yeni bir tarix yazdı. 27 sentyabr 2020-ci ildə başlayan və 44 gün davam edən müharibədə Azərbaycan Silahlı Qüvvələri Prezident, Ali Baş Komandan İlham Əliyevin rəhbərliyi ilə işğalda olan torpaqları azad etdi. Bu zəfər təkcə Azərbaycanın ərazi bütövlüyünü bərpa etmədi, həm də Xocalı şəhidlərinin qanını yerdə qoymadı. Vətən müharibəsi zamanı azərbaycanlı əsgərlərimiz təkcə hərbi peşəkarlıq deyil, həm də milli ruh və qisas duyğusunun ən ali səviyyəsini nümayiş etdirdilər. Hər bir şəhidin ruhunu rahatlatmaq və ədaləti bərpa etmək məqsədilə döyüş meydanında misilsiz fədakarlıq göstərildi. Füzuli, Cəbrayıl, Zəngilan, Qubadlı və digər ərazilərin işğaldan azad edilməsi ilə yanaşı, Şuşanın azadlığı bütün xalq üçün tarixi ədalətin bərpasının rəmzinə çevrildi.
Bu zəfər yalnız hərbi qələbə deyil, həm də beynəlxalq hüququn və milli haqlarımızın bərpa olunmasının göstəricisi oldu. Azərbaycan dövləti beynəlxalq arenada Xocalı soyqırımını tanıtmaq üçün illərdir yorulmadan çalışır. Artıq bir çox dövlət və beynəlxalq təşkilatlar bu faciəni soyqırım kimi tanıyır, bu da Xocalının unudulmadığını və haqq mübarizəsinin davam etdiyini göstərir. Azərbaycan Ordusunun qəhrəmanlığı və xalqın birlik ruhu, Xocalı şəhidlərinin ruhunu şad etdi. Bu gün azad Qarabağda yeni həyat başlayır, amma Xocalı soyqırımının ağrısı heç vaxt unudulmayacaq. Qələbəmiz həm tariximizdə, həm də gələcək nəsillərin yaddaşında ədalətin, qəhrəmanlığın və birliyin ən parlaq nümunəsi kimi yaşayacaqdır.
Ələkbər Novruzov,
YAP Xəzər rayon təşkilatının gənc fəalı
