Azərbaycan Respublikasında gənclər siyasətinin mahiyyətini və əhəmiyyətini hüquqi cəhətdən tənzimləyən əsas sənəd “Gənclər siyasəti haqqında” Azərbaycan Respublikasının Qanunudur. Bu qanun, gənclərin hərtərəfli inkişafı, onların hüquq və azadlıqlarının təmin olunması, eyni zamanda, cəmiyyətin fəal üzvləri kimi formalaşmaları üçün zəruri şəraitin yaradılmasını nəzərdə tutur. Ulu Öndər Heydər Əliyevin gənclər siyasətinin davamı olaraq qəbul edilən bu qanun, gənclərin cəmiyyətin bütün sahələrində fəallığını artırmaq məqsədi daşıyır.
Qanunun əsas məqsədi gənclərin təhsil, mədəniyyət, idman, məşğulluq və sosial təminat kimi sahələrdə imkanlarını genişləndirməkdir. Gənclərin intellektual və fiziki potensialının inkişafına dəstək göstərmək, onları dövlət idarəçiliyində və ictimai həyatda fəal iştirak etməyə təşviq etmək qanunun əsas prioritetlərindəndir. Bu sənəd gənclərin peşəkar bacarıqlarını artırmaq üçün müxtəlif proqramlar, təqaüdlər və layihələrin həyata keçirilməsinə hüquqi zəmin yaradır.
“Gənclər siyasəti haqqında” Qanun, həmçinin gənclərin hüquqlarının qorunmasını təmin edir. Onların bərabər imkanlara malik olması, cinsi, milli və ya sosial mənsubiyyətinə görə ayrı-seçkiliyə məruz qalmaması qanunun əsas prinsiplərindən biridir. Bununla yanaşı, gənclərin beynəlxalq səviyyədə təmsil olunması, müasir biliklərə yiyələnməsi və innovativ layihələrdə iştirak etməsi də qanunda xüsusi yer alır.
Qanun çərçivəsində həyata keçirilən tədbirlər gənclərin ictimai-siyasi həyatda iştirakını artırmağa yönəlmişdir. Gənclər təşkilatlarının fəaliyyəti, könüllülük hərəkatları və müxtəlif sosial layihələr vasitəsilə gənclər cəmiyyətin inkişafına aktiv töhfə vermək imkanı əldə edir. Bu yanaşma gənclərin həm fərdi, həm də kollektiv şəkildə cəmiyyətin aparıcı qüvvəsinə çevrilməsinə şərait yaradır.
Ümumiyyətlə, “Gənclər siyasəti haqqında” Qanun Azərbaycan gəncliyinin hüquq və maraqlarını qoruyan, onların inkişafını təmin edən və dövlətin dayanıqlı gələcəyini formalaşdıran mühüm bir sənəddir. Bu qanun, ölkənin gələcək inkişafında gənclərin aparıcı qüvvə kimi çıxış etməsini təmin etmək üçün əhəmiyyətli bir hüquqi baza yaradır.
Rəna Şükürova,
YAP Xəzər rayon təşkilatının fəalı
