2024-cü ilin 11-22 noyabr tarixlərində COP29 konfransının Bakıda keçirilməsi Azərbaycanın qlobal ekoloji liderliyini təsdiqləyən mühüm hadisədir. Bu tədbir iqlim dəyişikliyi ilə mübarizə sahəsində qlobal əməkdaşlığın möhkəmləndirilməsi, yaşıl enerji keçidinin sürətləndirilməsi və karbon emissiyalarının azaldılması üzrə yeni təşəbbüslərin reallaşdırılması üçün mühüm platforma oldu. Azərbaycan COP29-un keçirilməsi üçün yüksək səviyyədə təşkilatçılıq nümayiş etdirdi. Tədbirə bir çox dövlət başçıları, beynəlxalq təşkilatların nümayəndələri və ekoloji sahədə ekspertlər qatıldı. Konfrans çərçivəsində karbon emissiyalarının azaldılması, iqlim maliyyəsi və adaptasiya mövzularında müzakirələr aparıldı. COP29-un Bakıda keçirilməsi Azərbaycan üçün qlobal əməkdaşlıqda iştirakını artırmaqla yanaşı, milli ekoloji siyasətinin müsbət təsirini daha geniş miqyasda nümayiş etdirmək üçün unikal bir şans oldu. Bu konfrans, həmçinin dünya dövlətlərini iqlim dəyişikliyinə qarşı birgə səyləri gücləndirməyə çağırdı. COP29 dünyanın bütün ölkələrinin iqlim dəyişikliyi ilə mübarizədə qlobal qərarlar qəbul etmək üçün toplandığı ən böyük çoxtərəfli forumdur. COP29 konfransı iqlim böhranının həlli üçün kollektiv tədbirlər, istixana qazlarının azaldılması, daha dayanıqlı icmaların qurulması və 1,5°C temperatur artım həddinə çatmamaq üçün strategiyaların hazırlanmasına yönəlib. Bu tədbir Azərbaycanın iqlim siyasətində beynəlxalq liderliyini vurğulayan tarixi hadisədir. Tədbirin əhəmiyyəti aşağıdakılardan ibarətdir: COP29 inkişaf etməkdə olan ölkələrə maliyyə dəstəyi təmin edərək onların iqlim dəyişikliklərinə uyğunlaşmasını sürətləndirməyi və yeni qlobal maliyyə hədəflərini müəyyənləşdirməyi qarşısına məqsəd qoyur. Eyni zamanda, innovativ texnologiyaların tətbiqi və genişləndirilməsi də müzakirə olunur. Ölkələrin təqdim etdiyi milli səviyyəli töhfələrin (NDC) gücləndirilməsi üçün iş aparılır. Ölkələr öz milli səviyyəli töhfə planlarını (NDC-ləri) təkmilləşdirərək karbon emissiyalarını azaltmaq və təmiz enerji mənbələrinə keçidi sürətləndirmək üçün planlarını təqdim edir. Tədbir təkcə dövlət nümayəndələri deyil, həm də biznes liderləri, gənclər, yerli icmalar və vətəndaş cəmiyyəti üzvləri ilə birgə müzakirələrin aparılacağı inklüziv bir platforma kimi fəaliyyət göstərir. COP29 konfransında dünya liderləri iqlim dəyişikliyinin təsirlərini azaltmaq və uyğunlaşma tədbirlərini gücləndirmək üçün yeni strategiyalar qəbul edir. 1,5°C temperatur artımını məhdudlaşdırmaq əsas prioritetlərdən biridir. Ölkəmizin COP29-a ev sahibliyi etməsi, Azərbaycanın qlobal ekoloji problemlərin həllindəki fəal rolunu vurğulayır və ölkənin dayanıqlı inkişaf siyasətlərinin beynəlxalq səviyyədə tanınmasına səbəb olur. Bu tədbir, həmçinin Azərbaycanın iqtisadi, mədəni və siyasi gücünü nümayiş etdirmək üçün bir fürsətdir. COP29, qlobal miqyasda iqlim dəyişikliyi ilə mübarizəni sürətləndirəcək bir dönüm nöqtəsi olaraq önəmli nəticələr verdi. Bu tədbir, inkişaf etməkdə olan ölkələrin iqlim dəyişikliyi ilə mübarizədə daha böyük rol oynamasını təmin edəcək, həmçinin bütün dünyada təmiz enerji keçidi və karbon emissiyalarının azaldılması üçün güclü bir çərçivə yaratdı.
Məmmədova Nərmin,
YAP-ın gənc fəalı
